Udalak 500.000 eurotik gorako aurrekontua onartu du Correoseko eraikina eraitsi eta Udaletxeko plaza handitzeko
DURANGO | Durangoko Udalak aste honetan ospatu zuen azaroko ohiko Osoko Bilkura, eta bertan hainbat proiektu estrategiko onartu ziren udalerriarentzat.
Bilkuran onartutako puntu nagusietako bat kreditu-aldaketa bat izan zen, kreditu gehigarriaren modalitatean, Correoseko eraikinaren eraisketa eta udaletxeko plazaren berrurbanizazioa finantzatzeko. Ekintzak alboko mehelina ere hobetzea aurreikusten du, eta guztira 504.554,04 euroko aurrekontua izango du. Zenbateko horretatik, Eusko Jaurlaritzako Kultura Sailak 224.382,00 euroko dirulaguntza emango du, eta gainerakoa udalaren diruzaintzako gerakinen bidez finantzatuko da. Jarduera honek espazio publikoa handitu eta udalerriaren erdiguneko irudi urbanoa hobetuko du.
Bestalde, 2026ko ekitaldirako udal tasa eta zergen ordenantza fiskalen aldaketari egindako alegazioen ebazpena eta behin betiko onespena eman zen. 2026rako, zergak eta tasak izoztea aurreikusten da durangarrentzat. Guztira bi alegazio aurkeztu dira: bata Toledoko abokatu batek eta bestea Herriaren Eskubidea taldeko bozeramaileak. Alegazio biak ezetsi egin dira udal zerbitzu juridiko eta teknikoen txostenetan oinarrituta. Lehen kasuan, aurkeztutako pertsonak ez duela legitimaziorik adierazi da, eta bigarrenean, aurrez eztabaidatutako eta atzera botatako zuzenketa baten edukia berriro aurkezten dela ondorioztatu da.
HAPB Kapitanena
Era berean, behin betiko onartu zen Kapitanena baserriari dagokion Hiri Antolamenduko Plan Berezia (HAPB). Onarpen horri esker, orain arte erabilera pribatiboa zuen eraikina espazio publiko bilakatu ahal izango da, gizarte-, kultura-, jolas- eta elkarte-helburuekin. San Fausto auzoko bizilagunen eskaera historikoa da, eta hurrengo urratsa exekuzio-proiektua lizitatzea izango da. Obrak 2026ko azken hiruhilekoan hastea aurreikusten da, eta 933.615,71 euroko aurrekontua eta 10 hilabeteko iraupena izango dute.
Horrez gain, Larrasoloetako 1., 2., 3. eta 4. eremuen xehetasun-azterketa behin betiko onartu zen. Proiektuak 99 etxebizitza eta 213 aparkaleku berri aurreikusten ditu. Azaro honetan bertan hasi dira urbanizazio-lanak, eta abenduan eraikuntza-lizentziak ematea aurreikusten da. Jarduketa hau Antso Estegiz eremuko urbanizazioaren bigarren fasearen barruan kokatzen da, eta 1.538.655,08 euroko aurrekontua eta 14 hilabeteko exekuzio-epea izango ditu.
Kultura arloan, 66.740,60 euroko kreditu-aldaketa bat aurkeztu zen: horietatik 44.500 euro Landako Gunean egingo diren konponketetara bideratuko dira, eta 22.240,60 euro San Agustin Kultur Gunean egin beharreko premiazko lanetara, OCA ziurtagiria lortzeko. Kirol instalazioei dagokienez, 62.200 euroko kreditu-aldaketa bat onartu zen, Tabira, Landako eta San Faustoko kirol-guneetan hobekuntzak egiteko eta langile-gastuak handitzeko (%0,5).
EH Bildu-PPko mozioak
Azkenik, EH Bilduk aurkeztutako mozio bat eta PPk aurkeztutako emendakina eztabaidatu ziren Osoko Bilkuran. Biak baztertuak izan ziren.
