Durangarrak markagailuan aurreratu ziren, baina 84. minutuan hartu zuten gola.
FUTBOLA | Puntuen banaketa Tabiran Zamudioren aurka jokatutako Culturalaren estreinaldi arinean (1-1). Beroak eta bi multzoen arteko berdintasunak markatutako talka. Durangarrak ondo sartu ziren neurketara eta zenbait hurbilketa arriskutsu izan zituzten lehen minutuetan. Ondoren, bisitariek lerroak aurreratu zituzten eta berdintasuna eta joko eskasa nagusitzen hasi ziren berdegunean. Atsedenaldian, markagailua ez zen mugitu Tabiran.
Berriro ekin ziotenean, oso gutxitan, eta bazirudien aurreratzen ari zen taldeak katua uretara eramango zuela. Lehen kolpea 61. minutuan eman zuen Culturalek, Jon Filippiniren bitartez, txuri-urdinen laukitxoa estreinatuz. Teknologia Elkartekoek berdinketaren bila jo zuten eta 84. minutuan lortu zuten. Tabiraren mutilek geldikako errematea izan dute, baina burukada gutxigatik joan da.
Berdinketa eta denboraldiko lehen puntua Iker Dorronsorok zuzentzen dituen gizonentzat. “Lehen jardunaldiko ohiko partida, beroak eta zelai lehor batek baldintzatuta. Lehenengo hogei minutuak gureak izan ziren, ondo sartu ginen eta pare bat aukera izan genituen aurrea hartzeko. Ondoren norgehiagoka berdindu egin zen, aukera gutxi eta argitasun falta. Aurrea hartu genuenean, Zamudiok bi aurrelari jarri zituen baloiak zintzilik, eta gehiegi sufritu ez bagenuen ere, ez ginen eroso egon. Berdinketaren tantoan sendotasuna falta izan zitzaigun hegaleko sake batean. Pena partida nahiko bideratuta geneukalako eta bi puntuk ihes egin zigutelako. Esan beharra dago, baita ere, Zamudiok partida duina jokatu zuela eta puntu honekin konformatu behar dugula “, adierazi zuen gipuzkoarrak.
Hurrengo jardunaldian, Aretxabaletari egingo dio bisita Culturalak, Zarautzen galdu eta gero. Norgehiagoka igandean jokatuko da, 16:30ean, Ibarran.
