Abenduaren 5tik 8ra luzatuko den 59. edizioak 153 partaide eta 274 stand izango ditu
DURANGO | 59. Durangoko Azoka ate joka dago eta, ohikoa den bezala, egitaraua aurkezteko prentsaurrekoa egin dute gaur San Agustin kulturgunean. Izan ere, hilabetetako lanaren ostean, antolakuntzaren asmoak forma hartzen hasi dira: egitaraua esku artean, erakusmahaien kokapena antolatuta, kultur nobedadeen zerrenda osatuta… eta prestaketen azken txanpan murgilduta. Abenduaren 5etik 8ra garatuko da Durangoko Azoka eta Landako Gunean 274 erakusmahai ipiniko dituzte 153 partaideren artean, eta 933 kultur nobedade egongo dira kulturazaleek hartzeko eta emateko eta 200 kultur-ekitaldi inguru programatu dira azokako guneetan.
Denetariko estilo eta gaiak jorratuko ditu aurtego azokak eta horien guztien xehetasunak ezagutzera eman dituzte gaur. Agerraldian, egitarauaren antolaketan lanean ari diren arduradunak izan dira: Beñat Gaztelurrutia (Gerediaga), Izaskun Ellakuriaga (Talaia), Gotzon Barandiaran (Ahotsenea), Irati Agorria (Irudienea), Diana Franco (Kabia), Itxasne Arabiourrutia (Saguganbara), Maider Larrañaga (Szenatokia) eta Aitor Agiriano (Azoka Telebista).
Durangoko Azokaren ateak zabaltzeko gogotsu daudela azaldu du Beñat Gaztelurrutia koordinatzaileak. «Bertan bilduko gara kultura bizi eta zaindu nahi dugun sortzaileak, argitaletxetako kideak, kulturgintzako langileak eta zaleak. Denak ditugu beharrezko. Aurten, dei berezia egin gura diegu zaleei, kultur sistema osasuntsu baterako ezinbestekoak direlako», esplikatu du Gaztelurrutiak.
