Zaborren tasa 5 edo 6 euro artean igoko da hiru hilean behin etxebizitza bakoitzerako
IURRETA | Iurretako Udalak, EAJ-PNV eta PSEren aldeko botoekin eta EH Bilduren abstentzioarekin, 2025erako tasak, zergak eta ordenantza fiskalak eguneratzea onartu du asteazken honetan, Zerbitzu Publikoak eta Jarduerak hobetzeko helburuarekin.
Horrela, KPIak gora egiten jarraitu badu ere, datorren urtean Iurretako Udalak tasa eta prezio publiko gehienak oro har % 2,5 igoko ditu, zerbitzuen kostu gero eta handiagoa egokitzeko eta kalitate-estandar berak hurrengo urterako mantenduko direla bermatzeko. Horrela, Iurretako Udalak beharrezko baliabideak izaten jarraitu ahal izango du iurretarrei kalitatezko zerbitzuak eskaintzeko.
Era berean, Ordenantzetan orain arte bezala aplikatzen jarraituko diren hobariak jasotzen dira, pertsona guztiek aukera berdinak izan ditzaten. Kulturaren, zaborren eta estolderiaren tailerren kasuan, hobariak egongo dira diru-sarreren errentaren arabera; OHZn, eguzki-plakak instalatzeagatik; eta ibilgailu elektriko eta hibridoak izateagatik.
Bestalde, datorren urtean 7/2022 legea sartuko da indarrean. Lege horrek ezartzen du hondakinak biltzearen eta kudeatzearen kostu guztiak bermatu edo estali behar direla zabor-bilketaren tasarekin, eta bilketa-tasa sortutako hondakinen arabera ordaindu beharko litzatekeela. Gaur egun, zaborra biltzeko tasatik lortzen diren diru-sarrerak ez dira nahikoak hondakinak biltzeko eta kudeatzeko kostu osoa estaltzeko. Beraz, Iurretak zaborraren, hondakinen eta lurzoru kutsatuen tasa handitu beharko du ekonomia zirkularra lortzeko eta gehien sortzen duenak ordaintzen duen eredu baterantz aurrera egiteko. Igoera hori 5 edo 6 euro artekoa izango da etxebizitza bakoitzerako.
Oskar Koka herriko alkateak adierazi duenez, “onartutako ordenantzetan lehentasuna eman nahi izan diegu pertsonen ongizateari eta zerbitzuen kalitateari, bai eta iraunkortasunari eta ingurumen-ikuspegiari buruzko irizpideei ere, Iurreta udalerri atseginagoa izan dadin”.
