Minimoek eta maximoek gora egingo dute datozen egunetan Durangaldean
EGURALDIA | Udak agur esango du eta badirudi azken egunetan baino tenperatura beroagoekin egingo duela. Hala, ostarteak eta hodeiak tartekatuko dira, eta, zenbait unetan, euria egingo du. Termometroak errekuperatzen joango dira egunak igaro ahala, eta aste amaieran 25 edo 26 izango dira. Udazkena igande honetan iritsiko da, 14:44an.
Astelehena, eguzkitsua
Astelehenean giro eguzkitsua nagusituko da, baina asteburuan ez bezala, behe-hodeiak sor daitezke kostaldean, eta gainerakoan goi-hodei batzuk agertuko dira. Haizeak iparraldetik edo ipar-ekialdetik joko du eta eguneko tenperaturak 20-22 ºC ingurukoak izango dira. Lehen orduak hotzak izango dira berriro, batez ere barrualdean.
Asteartea, hodei gehiago
Asteartean aldaketa txiki batzuk ikusiko ditugu. Goizean, oro har, giro eguzkitsua izango dugu. Hala ere, egunean zehar behe-hodeiak ikusiko ditugu, batez ere ipar partean, eta arratsaldean eta gauean barnealdeko zenbait puntutara zabalduko dira. Goizean ipar-ekialdeko haizea ibiliko da eta tenperatura maximoak apur bat jaitsi daitezke. Minimoak igo egingo dira, eta gauean eta egunsentian ez du hainbeste hotz egingo.
