Trafiko zein aparkaleku murrizketak eragingo ditu herriguneko hainbat kaletan, besteak beste Nafarroa, Bizkargi, Belatxikieta, Jauregibarria eta Azoka kaleetan
AMOREBIETA-ETXANO | Asteburu honetan bueltan izango da Amorebieta-Etxanon 2025eko Udaberri Klasika, txirrindulari zaleentzako tradizio bilakatu den hitzordua, alegia. Apirilaren 5ean eta 6an ospatuko da eta elite, kadete eta junior mailako txirrindulariak bilduko ditu. Hala, beste urte batez, lehiaketak kirolaz gozatzeko ez ezik, parte hartuko duten gazteei babesa emateko aukera paregabea eskainiko du.
Amorebieta Txirrindulari Elkarteak antolatua eta Amorebieta-Etxanoko Udalak babestua, Udaberriko Klasika ezinbesteko hitzordua da txirrindularitza zaleentzat eta kirol honetan trebatu nahi duten gazteentzat ere. “Udaberriko Klasika kirol lehiaketa bat baino askoz gehiago da: Amorebieta-Etxanok txirrindularitzarekiko duen tradizioaren adierazle da, zazpi hamarkada baino gehiago baitaramatza Gure txirrindularitzaren historiaz harro gaude eta gure herrian balio hauek sustatzen jarraituko dugu. lldo horretan, asteburu honi begira, guztiok gonbidatzen zaituztegu ekitaldi honetaz gozatzera eta parte-hartzaileak animatzera “, adierazi du Ainhoa Salterain alkateak.
Lasterketak, ordutegiak eta modalitateak
Udaberriko klasika apirilaren 5etik 6ra bitartean ospatuko da, kategoria eta ordutegi desberdinetan banatuuuta:
- Apirilak 5, larunbata:
- 10:00etan: Kadete maila
- 15:30ean: Junior maila
- Apirilak 6, igandea:
- 10:00etan: 23 urtez azpikoen kategoria
Trafiko mozketak eta murrizketak
Era berean, 2025eko Udaberriko Klasika dela eta, Amorebieta-Etxanoko Udalak ibilgailuen zirkulazioari eta aparkatzeari dagokienez hartuko diren behin-behineko neurri hauen berri eman du:
- Aparkatzeko debekua:
- Nafarroa kalean, San Joan biribilgunetik Nafarroa aparkalekuraino, aparkalekua barne, debekatuta egongo da apirilaren 4ko 20:00etatik apirilaren 6ko 15:00etara aparkatzea.
- Trafiko-etenak:
- Nafarroa, Bizkargi, Belatxikieta, Jauregibarria eta Azoka kaleetan unean uneko trafiko-etenak egingo dira. Mozketak 09:00etatik 14:00etara eta 16:00etatik 18:30era egingo dira apirilaren 5ean, eta 09:00etatik 14:00etara apirilaren 6an.
Udalak herritarren lankidetza eta ulermena eskatzen ditu, aldi baterako murrizketek sor ditzaketen eragozpenengatik.. Neurri hauen helburua da probaren garapen egokia bermatzea eta, era berean, bai txirrindularien bai herritarren segurtasuna zaintzea. Egoiliarrei zein bisitariei joan-etorriak aldez aurretik antolatzea, eta trafiko-agenteen jarraibideak betetzea eskazen zaie.
