‘Palestina, causa y lucha: Emakume Palestinar baten begirada’ erakusketa ikusgai egongo da Kultur Etxean, martxoaren 4tik 11ra
BERRIZ | Berrizko Kultur Etxeak “Palestina, causa y lucha: Emakume Palestinar baten begirada Euskal Herritik” erakusketa antolatu du martxoaren 4tik 11ra.
Rouhaifa Kassemek, azken hilabeteetan Berrizen bizi izan den artista palestinarrak, Palestinako errealitateari buruzko begirada berezi, hurbil eta hunkigarria aurkezten du erakusketa honetan. Izan ere, bere pinturek, hainbat bloketan bilduta, bere herriko emakumeak ezagutzeko eta deskubritzeko aukera ematen dute, telebistan eta beste hedabide batzuetan ikusten dugunari begirada intimoa emanez.
Martxoaren 4an, erakusketa inauguratuko da 16:30ean Berrizko Kultur Etxean, Rouhaifa Kassem artista bera bertan dela, eta aukera paregabea izango da palestinar eta palestinar herriko emakumeen bizipenak ezagutzeko, haien ehunetara, sinboloetara, erresistentzietara eta itxaropenetara hurbilduz.
Berrizko Udalak dei egiten die herritarrei datozen egunetan erakusketa ikustera anima daitezen.
