Datorren martxoaren 21ean izango da, Landako Gunean, horien artean Belako, J Martina, Anari, Olatz Salvador eta Merina Gris egongo dira
DURANGO| Datorren martxoaren 21ean Palestinaren aldeko kontzertua ospatuko da Durangon hainbat euskal musikari eta talde ezberdinekin Palestinarekin Elkartasuna elkarteak antolatuta. Baieztatutako artisten artean Belako, Anari, Merina Gris, J Martina eta Olatz Salvador daude. Jaialdiak bestelako jarduera artistikoak ere izango ditu.
Jaialdian belaunaldi eta musika estilo ezberdinetako artista eta taldeek parte hartuko dute. Buruan Anari, Belako, Merina Gris, J Martina, Eire, Hofe, Ibil Bedi eta Olatz Salvador daude. Horrez gain, Lukiek, Borla, Bengo, Chulería Joder!, Dena, La Furia, Gailu, Ke Lepo, Malakias, Odei eta Mateo Zikuta ere arituko dira. Jaialdian dantzariek, bertsolariek eta umoristek ere parte hartuko dute.
Sarreren salmenta
Sarrerak urtarrilaren 28an jarriko dira salgai eta 15 eta 25 euroko salneurria izango dute. Jaialdiko antolakuntzako iturriek azaldu dutenez, ez dago alderik bi sarrera moten artean, prezioa izan ezik. Beraz, jaialdira joaten den pertsona bakoitzak bata edo bestea erosi ahal izango du bere diru-sarreren arabera, eta ekarpenak ere egin daitezke.
