Azken Urteko Memoriak online iruzurrak eta iruzur orokorrak ugaritu direla nabarmentzen du, hala nola phishing kasuak eta kreditu txarteletako karga baimendu gabeak
DURANGO | Iaz, Durangaldeko Mankomunitateko Informazio Bulegoak 2.277 kontsultari erantzun zien, 2023an baino 119 gehiago. Gainera, kontsumitzaileen eta enpresen arteko bitartekaritza ere funtsezko arloa izan da, 1.156 espediente izapidetu baitira. 2023arekin alderatuta, % 8,04 jaitsi da erabiltzaile eta enpresen arteko bitartekaritza kopurua, neurri batean, aurretiazko kontsulten ebazpenean eraginkortasun handiagoa izan delako.
Durangaldeko Mankomunitateko Idoia Otaduy lehendakariak nabarmendu duenez, “Informazio Bulegoak prebentzio eta dibulgazio lan handia egin du, bai arreta pertsonalizatuko zerbitzuen bidez, bai kontsumitzaileen babesa hobetzeko informazio-kanpainen bidez”.
Zentzu horretan, erreklamazio gehien dituzten sektoreen artean telekomunikazioak, bankuak, bidaiak eta oinarrizko hornidurak (ura, argia eta gasa) nabarmentzen dira. Zehazki, hipoteka- gastuengatiko erreklamazioek igoera nabarmena izan dute, eta erreklamazioen % 70era iritsi dira urteko lehen hiruhilekoan, esparru horretan kontsumitzaileen eskubideei buruzko informaziorik ez dagoelako.
Txostenak online iruzurrak eta iruzur orokorrak ugaritu direla nabarmentzen du, phishing kasuak eta kreditu txarteletako karga baimendu gabeak barne. Horrek Informazio Bulegoari ahalegin gehiago eskatu dio, bankuekin aholkularitza eta bitartekaritza indartuz.
Informazio Bulegoak gogorarazi nahi die herritarrei zerbitzuarekin harremanetan jar daitezkeela 94 620 27 07 telefonoaren edo omic1@dma.eus eta omic2@dma.eus helbide elektronikoen bidez, kontsumitzaile gisa dituzten eskubideekin lotutako edozein kontsulta edo erreklamazio egiteko.
