Urtarriletik irailera bitartean lau lapurretatan parte hartu ahal izan dute
ERMUA | Ermuko Udaltzaingoak eta Ertzaintzak hiru pertsona atxilotu zituzten atzo arratsaldean, urtarrila eta iraila bitartean etxebizitzetan lapurtu zutelakoan.
Udaltzainak urtarrilean, abuztuan eta irailean Ermuan egindako lau lapurreta ikertzen aritu dira. Herriko hainbat puntutan dagoen teknologiari esker, agenteek ibilgailu baten matrikula identifikatu ahal izan dute, baita ustez lau gertakariekin zerikusia duten hiru pertsona ere. Horietan dirua eta objektu pertsonalak lapurtu dituzte.
Lapurretak Seigarren Mendeurrena kaleko etxebizitza batean gertatu dira, urtarrilean, eta San Lorenzo auzoko hiru etxebizitzatan, abuztuan eta irailean. Modus operandia berdina izan da lau aldi hauetan: bi pertsona atariaren barruan sartzen dira eta etxebizitza bakoitza atez ate aztertzen dute; beste bi pertsonak, berriz, ataria zaintzen dute eta “hautatutako” etxeen txirrina jotzen dute barruan pertsonak dauden ikusteko.
Udalerrian jarritako kameretako irudiei esker, lau delitu horien atzean egon daitezkeen lau pertsonetatik hiru identifikatu ahal izan dituzte, baita lekualdaketetarako erabilitako ibilgailua ere.
Azken asteetan bildutako arrastoen ondoren, atzo, astelehena, 16:00etan, hiru pertsona horiek Bizkaia Etorbidean zeudela ikusi zen. Hori dela eta, udaltzainak eta Ertzaintza bertaratu ziren susmagarriak atxilotzeko.
