Taldea, Durangoko Kurutziaga, Landako, San José Jesuitak, San Antonio, Zabalarra eta Nevers eskoletako 4. eta 5. mailako ikasleek osatzen dute
DURANGO | Aste honetan Durangoko Haurren Kontseiluak, udalerriko hainbat eskolatako lehen hezkuntzako 4. eta 5. mailako 13 haurrek osatutako taldeak, alkateari eta Udalbatzako zinegotziei 2024-2025 ikasturterako egindako lanaren emaitzak aurkeztu zizkieten. Taldea Kurutziaga, Landako, San José Jesuitak, San Antonio, Zabalarra eta Nevers eskoletako ikasleek osatzen dute, eta udalerriaren inguruko diagnostiko zehatza egin dute, hainbat gai garrantzitsuren inguruan, hala nola, udalerriko espazioen hobekuntza, migratzaileekiko harremanen zaintza eta pertsonen arteko harreman osasungarriak.
Aurkeztutako proposamenen artean, haurrek azpimarratu dute ingurune osasungarri eta irisgarri batean harremanetan jartzeko, jolasteko eta gozatzeko espazioak sortzearen garrantzia. Haurrek, bereziki, espazio publikoak hobetzeko beharra nabarmendu dute, parkeak, adibidez, herritar guztientzat irisgarriak, inklusiboak eta seguruak izan daitezen. Haien proposamenek ingurunearen errespetua, bizikidetza eta zaintza sustatzea planteatzen dute, erabiltzaile guztien beharretara egokituz eta haurren, nerabeen, adinekoen eta familien arteko jolasa eta interakzioa erraztuz.
Era berean, “Durango Tour” izeneko ibilbide bat sortzea iradokitzen dute, harremanak sustatuz eta Durangora bizitzera datozen pertsonei udalerriko espazioak ezagutzen eta gozatzen lagunduz, lankidetza eta tratu oneko giroa sustatuz.
Haurren ustez, garrantzitsua da beren iritziak kontuan hartzea, eta proposatzen dute hobekuntzek benetan erantzun diezaietela beren beharrei. Halaber, ondo pasatzea eta elkarri laguntzea oso garrantzitsua dela nabarmendu dute .
Proposamen horiek zehazteko, Kontseiluak laguntza tekniko espezializatua izan du, prozesu osoan gidari izan dena, eta ikasturte osoan zehar haur taldearekin lankidetza estuan aritu da, herritar guztientzako proposamen errealistak bultzatzeko, haurren bizikidetza eta ongizatea sustatzeko helburuarekin.
Proposamen horiek bideratzeko lanak elkarrekin egingo dituzte Udalak eta haurrek, espazioek benetan erabiltzaileen beharrizan eta itxaropenei erantzuten dietela bermatuz. Alkateak eta udal arduradunek konpromisoa hartu dute proposamen horiek udal politiketan txertatzeko eta lankidetza estu horren bidez gauzatzen direla ziurtatzeko.
