Metro koadroko 80 litro pilatzea espero da hurrengo egunetan
EGURALDIA | Abisu horia laranjara pasatuko da igandean eta astelehenean, Bizkaian euri-jasa iraunkorrak espero direlako; izan ere, metro koadroko 80 litro pilatu daitezke. Horri gehitu behar zaizkio haizeagatik eta elurragatik datozen egunetan 800 metro inguruan kokatuko diren abisuak. Denboralea nabaritu da gaur goizean Durangon, haize-bolada gogorrek zuhaitz batzuk bota baitituzte, Arkotxa kaleko Madalena auzoko argazkian ikus daitekeenez. Azokaren egun hauetan, jende asko igarotzen da inguru horretatik, baina ez da inor zauritu.
Igandean ere antzera jarraituko dugu. Zerua estalita egongo da eta prezipitazioak ugariak izango dira. Elur-kota 800-1000 metro inguruan kokatuko da, eta ez da baztertzen 800 metrotik behera elurra ikustea ekialdeko zenbait tokitan. Gainera, trumoi-ekaitzak jo dezake eta txingorra ere bota dezake. Ipar-mendebaldeko haize bizia ibiliko da, batez ere egunaren lehen partean, eta tenperatura maximoak 7-11 ºC ingurukoak izango dira. Mendi inguruetan izotza egingo du.
