Igande honetan Loiola Indautxuri bisita eginez hasiko dute liga durangarrek
SASKIBALOIA | Emakumezkoen Tabirako Baqueko lehen taldeak ezin izan zion Unamunori irabazi (49-56) Kopako final-laurdenetan. Orain, igande honetan, Loiola Indautxuren aurka, Bilboko Jesuiten ikastetxean (12.15ean). Unamunoren aurkako norgehiagoka oso estua izan zen. Lehen zatian gaizki aritu ondoren, atsedenaldira 19-26ko aurkako markagailuarekin joan ziren. Aldageletatik igaro ondoren, taldea askoz hobeto sentitu zen, hobeto defendatu zuten eta askoz gehiago asmatu zuten uztaiari begira. Azken laurdenaren aurretik, berdinketa izan zen emaitza: 37 puntura. Azken partzialean, ordea, bisitariak hobeto aritu ziren eta zazpi puntugatik irabazi zuten norgehiagoka.
Gorane Urain izan zen saskiratzailerik onena, 19 punturekin (8 errebote), eta ondoren Miren Arin, hamar puntu eta zortzi erreboterekin.
