Asteburuan itzuliko dira Bizkaiko patroiaren omenezko ekitaldiak
ELORRIO | Egun handia gaur elorriarrentzat. Hiribilduak Berriotxoako San Valentin zaindariaren eta Bizkaiko patroiaren eguna ospatu du. Ekitaldirik jendetsuena meza nagusia izan da, Sortzez Garbiaren basilikako elizan, baina bigarren urtez jarraian ez da aurreko paseotxo tradizionalik izan.
Meza nagusiaren ostean, Iturri Zoro Elkartearteako kideek Euskolabel hanburgesazko pintxoak oparitu dituzte. Eguna amaitzeko, Berrio-Otxoa Orfeoiaren emanaldia izango da Santa Anako kaperan, 20:00etan.
Asteburuari begira, larunbatean eta igandean, egun osoan zehar, pilota, pala eta frontenis txapelketen finalak jokatuko dira plazako frontoian, Hori-Hori pilota klubaren eskutik. Elorrixa Ekologia Taldeak antolatuta, azoka ekologikoa izango da igande goizean.
