PPk zazpi zuzenketa, alegazio eta aldaketa aurkeztu dizkie 2025eko ordenantza fiskalei
DURANGO | Durangoko Udala 2025ean indarrean egongo diren ordenantza fiskalak eztabaidatzen ari da une honetan. Hala, Durangoko Alderdi Popularrak jakitera eman du zazpi alegazio, zuzenketa eta aldaketa egingo dizkiola EAJren eta PSEren gobernu-taldeak aurkeztutako proposamenari.
Alde batetik, Carlos Garcíak proposatu du familia ugarientzako OHZren hobaria % 50etik % 90era arte handitzea, eta merkataritzarako eta ostalaritzarako zaborren eta estolderien bilketa-tasa % 10 murriztea, benetan emandako zerbitzuaren kostuak berregokituz. Era berean, PPk proposatu du % 50eko hobaria ematea terraza eta mahaitxoen tasari eta erakusleihoen tasari 2025ean, eta OHZa % 5 murriztea merkataritza-lokaletara, eta OHZa % 5 murriztea bizitegi-erabilerako etxebizitzetarako, lehen etxebizitza familientzat edo hirugarren batzuei alokatzeko etxebizitzetarako.
Proposamenen artean sartzen da, halaber, % 50eko penalizazioa kentzea eta etxebizitza hutsei % 5eko penalizazioa aplikatzea, zigor hori egungo % 50etik % 5era murriztuz. «Salaketa, atestatua edo poliziaren edo epailearen txostena duten benetan okupatuta dauden etxebizitzen titularrei eta errentariak alokairua ordaindu ez duela froga dezaketen alokatutako etxebizitzaren titularrei OHZ kobratzea atzeratuko zaie, higiezinaren edukitza benetan berreskuratu edo alokairuaren zorra benetan kobratu arte», azaldu du Carlos García zinegotzi popularrak.
