Kaletik Gaztetxera gazte mugimenduak adierazi du absolbitu egin dituztela “froga faltagatik”
DURANGO | Kaletik Gaztetxerak gaur goizean jakitera eman duenez, gazte mugimenduko lau kide absolbitu egin dituzte “froga faltagatik”. Adierazi dutenez, “epaiketa irabazi dugu eta froga faltagatik usurpazio delitutik absolbituta geratu dira”.
Gogoratu behar da abenduaren 6an gertatu zela, Kaletik Gaztetxera mugimenduko hainbat gaztek Correoseko eraikina okupatu zutenean Udaletxe plazan, Gaztetxe bihurtzeko asmoz. Abenduaren 10ean jarri zuen salaketa Durangoko Udalak, eta handik egun batzuetara, 15ean, eraikina hustu zuten.
Gazte mugimenduak Durangon eta beste herri batzuetan Gaztetxe baten alde borrokan jarraituko dutela iragarri du. Aldi berean, eskerrak eman nahi izan dizkiete gaur goizean salatuei babesa ematera hurbildu diren gazteei.
Abenduaren hasierako okupazioaren ondoren, Durangoko Udalak abenduaren 16an iragarri zuen Eusko Jaurlaritzako Kultura eta Hizkuntza Politika Sailaren dirulaguntza jaso zuela Correosen eraikina eraisteko, “jarduera estrategikoa udalerriko funtsezko eremu hori berroneratzeko. Finantza-laguntza horri esker, plaza handitu ahal izango da eta mehelina hobetu ahal izango da, espazioa ingurune funtzional, irisgarri eta herritarren beharretara egokitua bihurtuz “.
Kultura eta Hizkuntza Politika Sailak Kultura Ondarearen balioa nabarmentzeko eta zabaltzeko ematen dituen laguntzen deialdiaren barruan eman da dirulaguntza hori. Udalak joan den uztailean aurkeztu zuen eskabidea, eta abenduaren 16an, astelehenean, zuen ebazpenaren berri. Ebazpen horren bidez 224.382,00 euroko dirulaguntza eman zitzaion “Durangoko Alde Zaharrean dagoen Correosen eraikin zaharra eraisteko”.
