Izena emateko epea irailaren 30ean amaituko da
DURANGO | Durangoko Azokaren 59. edizioa abenduaren 5etik 8ra egingo da, eta dagoeneko martxan dago standak eskatzeko izen-ematea. Argitaletxeek, diskoetxeek, ekoizleek, elkarteek, erakundeek, banatzaileek eta autoekoizleek durangokoazoka.eus webgunearen bidez egin beharko dute eskaera. Epea irailaren 30ean amaituko da.
Horrela, dagoeneko hasi dira 59. Azokaren prestaketa lanak. Standak eskatzeaz gain, laster irekiko dira programarako proposamenak aurkezteko eta Ikasle Goizan parte hartzeko izen-emateak. Aurrerago emango da horren berri.
Lau egunez, Durango euskal kulturaren topagune izango da. Landakon jarriko dira ikusgai nobedade guztiak eta, hainbat gunetan, kulturzaleek gertutik ezagutu ahal izango dituzte artistek aurkeztutako lanak. Gainera, hitzaldi, mahai-inguru eta tailerretan parte hartu ahal izango dute.
Abenduaren 5etik 8ra, lau jardunaldi ditugu zain kulturaz gozatzeko.
