Truke Azokaren helburua objektuen berrerabilera sustatzea eta ekonomia zirkularra indartzea da, eta 16:30etik 19:00etara egingo da
DURANGO | Martxoaren 13an, ostirala, Durangoko Truke Azokaren edizio berri bat ospatuko da Andra Mari elizako elizpean, 16:30etatik 19:00etara. Ekitaldiaren helburua objektuen berrerabilera sustatzea, ekonomia zirkularra indartzea eta durangarren artean lankidetza sustatzea da, truke arduratsu eta jasangarri batean parte hartzeko aukera eskainiz.
Parte-hartzaileek martxoaren 9an, 10ean eta 11n entregatu ahal izango dituzte objektuak ikastetxeetan, aldez aurretik izena eman beharrik gabe. Onartuko diren objektuak jostailuak, liburuak, arropa, apaingarriak, musika eta tresna teknologikoak izango dira, betiere egoera onean badaude. Ez da etxetresna elektrikorik, mugikorrik, tabletik, smartwatcherik edo entziklopediarik jasoko.
Ekitaldiaren egunean, martxoaren 13an, Andra Mariko elizpean, 15:30etik 16:30era, objektuak entregatu ahal izango dira, baina aldez aurretik izena eman beharko da online galdetegi baten bidez edo 685 738 123 telefonora deituta.
Azokaren antolaketan laguntzeko boluntario gisa parte hartu nahi izanez gero, gutxienez ekitaldia baino 10 egun lehenago eman beharko da izena, eta parte hartu nahi duten adingabeek gurasoen edo tutoreen baimena izan beharko dute. Baimenaren inprimakia ekitaldiaren egunean aurkeztu beharko da.
Objektuak entregatu ondoren, parte-hartzaileek objektu bakoitzeko txartel bat jasoko dute artikuluaren balorazioaren arabera: arrosa (balio baxua), urdina (balio ertaina) edo horia (balio altua).
16:30etatik aurrera, parte-hartzaileek merkatuan eskuragarri dauden objektuen ordez trukatu ahal izango dituzte txartelak. Txartel horiek pilatu ahal izango dira balio handiagoko gaiak lortzeko, modu honetan: 2 txartel arrosa = 1 txartel urdin, 4 txartel arrosa = 1 txartel hori eta 2 txartel urdin = 1 txartel hori. Norbaitek 2025eko azaroko Truke Azokan sobera izan bazituen txartelak, edizio honetan berriro erabili ahal izango dira.
Nahikoa txartel ez bada edo balio handiagoko objektuak lortu nahi badira, happy hour-era arte itxaron ahal izango da, 18:00etatik 19:00etara. Denbora horretan, azokan geratu diren objektuak eskuratu ahal izango dira, txartel beharrik gabe.
Durangoko Udalak herritar guztiak gonbidatzen ditu ingurumenarekiko eta iraunkortasunarekiko konpromisoa sustatzen duen ekimen honekin bat egitera.
