Athletic Clubek ez du azkenean Sociedad Deportiva Amorebietaren lehen taldearen aurka jokatuko
DOT KIROLAK | Sociedad Deportiva Amorebietaren Mendeurreneko Partidak badu data eta ordua. Uztailaren 19an, larunbata, jokatuko da, Karmengo jaien barnean, 20:00etatik aurrera Urritxeko udal zelaian. Halaber, parte-hartzaile bat Athletic Club izango dela baieztatuta dago, Txapeldunen Ligara itzuliko den denboraldiari begira jokatuko duen lehen prestaketa partida izango dena. Azkenean, lehoiek ez dute Urritxen SDAko lehen taldearen aurka jokatuko Mendeurreneko Partida honetan, hasiera batean aurreikusita zegoen bezala. Aldaketa hau Ernesto Valverderen nahiaren ondorio da, bere futbolariei 25-26 denboraldiko erronkari aurre egiteko behar den erresistentzia eskainiko dion talde bat nahi du eta. SDAko lehen taldeak ezin izango du oposizio hori eskaini talde zurigorriak Mendeurreneko Partidan parte hartzeko duen egun baliodun bakarrean, uztailaren 19an, urdinek bost egun beranduago ekingo baitiote denboraldiaurreari, uztailaren 24an (Bigarren Federazioan txapelketa irailaren 7an hasiko da).
SDAk eta Athletic Clubek datozen orduetan jakinarazi nahi dute lehoien aurkariaren izena Mendeurreneko Partidan. Kudeaketak oso aurreratuta daude. Zehaztu ondoren, klub zornotzarrak sarrerak erosteko prezioa eta modua jakinaraziko ditu.
SDAren Mendeurreneko Partidak bat egingo du uztailaren 19an klub zornotzarrak Marmitako Lehiaketaren baitan antolatu duen Mendeurreneko Bazkariarekin. Lehiaketa arrakastatsu honek 5.000 lagunetik gora eta ia 400 kuadrilla bildu zituen Amorebieta-Etxanoko kaleetan pasa den urtean.
Athletic Club klasikoa da SDAren ospakizun handietan. 1975eko martxoaren 19an, lehoiek Realaren aurka jokatu zuten talde zornotzarraren sorreraren 50. urteurrenean. Ohorezko sakea Jose Angel Iribar ‘El Txopo’ ospetsuak egin zuen, eta Athleticek, Rafa Iriondo mitikoak zuzenduta, 4-1 irabazi zuen. Urritxe berriaren estreinaldian ere talde zurigorria izan zen protagonista, 2002ko urriaren 12an, Racingen aurka eta Jupp Heynckes aulkian zela. Athletic Clubeko beste atezain historiko batek egin zuen ohorezko sakea, Carmelo Cedrun zornotzarrak, San Mamesera SDAtik heldu zen futbolaria. Lehoien kapitaina zen Aitor Larrazabalek buruz egin zuen lehen gola Urritxe berrian, Athletic Club 1-0 Racing de Santander neurketako gol bakarra izan zena.
Irudian, Athletic Clubeko jokalariak SDAko harrobiko futbolariekin batera Urritxe berriaren inaugurazio partidan 2002an.
