Urtarriletik martxora bitartean, asteartero, 19:00etan, Gariza Films-ek aukeratutako filmak proiektatuko dira, eta, ondoren, hautazko solasaldi bat egongo da
AMOREBIETA-ETXANO | Urtarrila honetan, Zornotza Aretoaren zinekluba berritu da, proposamen erakargarri eta desberdin batekin. Asteartero, 19:00etan, Gariza Films-ek, zornotzarra den Lara Izagirre zuzendariaren ekoiztetxeak, aukeratutako filmak eskainiko dira. Filmak ikusi ondoren, nahi duenak solasaldi ireki batean parte hartu ahal izango du, istorioari, mezuari eta xehetasun teknikoei buruz gehiago jakiteko.
Formatu berri honen helburua da ikusleek filmak ikusteaz haratago, zinena barrutik bizitzea eta ulertzea. Solasaldiak Gariza Films-eko taldeak gidatuko ditu, eta zenbait kasutan, filmen zuzendariak ere parte hartuko dute, beren ikuspegia modu zuzenean azalduz.
Lehen proiekzioa urtarrilaren 14an izango da, Lila Avilés zuzendari mexikarraren Tótem filmarekin. Ziklo honetan guztira bederatzi film eskainiko dira urtarriletik martxora. Beste film nabarmen batzuen artean daude Por donde pasa el silencio (Espainia), Un sol radiant (Katalunia) eta La quimera (Italia).
Film bakoitzerako sarrerak 4,80 euroko prezioa izango dute, eta solasaldia hautazkoa izango da, doan.
Zornotza Aretoaren zineklub berritu honek zinema modu desberdin batean gozatzeko aukera eskaintzen du, publikoari pantailatik harago joateko eta giro eroso batean ideiak eta hausnarketak partekatzeko gonbita eginez.
Egitaraua (2025eko urtarrila eta otsaila):
- 2025/01/14: Tótem (Mexiko, 95 min, JBA – Azpitituluak gaztelaniaz)
- 2025/01/21: Por donde pasa el silencio (Espainia, 99 min, JB)
- 2025/01/28: Un sol radiant (Katalunia, 85 min, JBA – Azpitituluak gaztelaniaz)
- 2025/02/11: La quimera (Italia, 131 min, JBA – Azpitituluak gaztelaniaz)
- 2025/02/18: The Human Hibernation (Espainia, 90 min, JBA – Azpitituluak gaztelaniaz)
- 2025/02/25: Ciento volando (Espainia, 92 min, JB)
