Txakur Kedada programak hiru hitzaldi eskainiko ditu Gallartako Kultur Etxean eta zortzi saio praktiko Preventorioan, urriaren 30etik urtarrilaren 9ra bitartean
ABANTO-ZIERBENA | Abanto Zierbenako Udalak txakurrak hezten eta zaintzen ikasteko doako 15 plaza eskainiko ditu, bereziki jokabide-arazoak dituzten txakurrei arreta jarriz. Udaleko Ingurumen Sailak antolatutako Txakur Kedada programak hiru hitzaldi eta zortzi saio praktiko izango ditu, urriaren 30etik urtarrilaren 9ra bitartean.
Musycan txakur-heziketako enpresak sustatutako ekimenak txakurren heziketa, osasuna, higienea eta ile-apainketa landuko ditu. Saioetan txakur-hezitzaile batek, albaitari batek, txakur-ileapaindegiko profesionalek eta txakur-heziketako eskola batek parte hartuko dute. Jarduera guztiak gaztelaniaz egingo dira.
Hitzaldiak
Hitzaldiak ostiraletan egingo dira, 19:30etik 21:00etara, Gallartako Kultur Etxeko erakusketa-aretoan. Lehenengoa urriaren 30ean izango da, eta José Requena txakur-hezitzaileak emango du. Hurrengo egunean, urriaren 31n, lehen saio praktikoa gidatuko du Musycanekin batera.
Azaroaren 13an, Nerea Lara albaitariaren txanda izango da; Sopuertako Veterinarios Entxozaga klinikakoa da. Azken hitzaldia azaroaren 27an egingo da, T&S Groomer txakur-ileapaindegiko arduradunen eskutik. Saioan erakustaldiak egingo dituzte.
Saio praktikoak larunbatetan izango dira, 10:00etatik 12:00etara, Preventorioan. Euria eginez gero, El Casal ikastetxeko patio estalira eramango dituzte. Bi orduko zortzi saio izango dira, guztira 16 orduko prestakuntza. Lehen saioaren ondorengoak Musycanek gidatuko ditu, azaroaren 7an, 14an, 21ean eta 28an; abenduaren 12an eta 19an; eta urtarrilaren 9an.
Izena emateko epea
Programak 15 plaza izango ditu, eta Abanto Zierbenan erroldatutakoek lehentasuna izango dute. Izena programa osorako eman behar da, baina parte-hartzaile bakoitzak nahi dituen saioetara joateko aukera izango du.
Izena emateko, izen-abizenak, helbidea eta NAN zenbakia eman behar dira. Horretarako, 94 404 06 00 telefonora deitu daiteke, 12:00etatik 15:00etara, edo ingurumena@a-zz.net helbidera idatzi.
Izena ematen dutenak WhatsApp talde batean sartuko dira, Amigos Adoptados elkarteko Veli Zapata txakur-hezitzailearekin harreman zuzena izateko.
Parte-hartzaileak txakurrarekin edo txakurrik gabe joan ahal izango dira. Txakurrek lotuta egon beharko dute une oro, eta arriskutsuak izan daitezkeen txakur gisa sailkatutakoek muturrekoa ere eraman beharko dute. Pertsona bakoitzak behar bezala zaindu eta kontrolatu ditzakeen adina txakur eraman ahal izango ditu. Saio praktikoetarako, lepokoa, uhala eta, beharrezkoa denean, muturrekoa eraman beharko dira.
Adingabeek ere parte hartu ahal izango dute, betiere heldu batekin joanez gero. Antolatzaileek gogorarazi dute txakurrekin lan egiteko eta ikasteko saioak direla, ez txakurrekin jolasteko jarduerak.
