255.000 euroko inbertsioarekin errepidearen irisgarritasuna eta segurtasuna hobetuko dira
ABADIÑO | Udalak Sagasta auzoko bidea konpontzeko lanen lizitazioa lehiaketara atera du. 255.000 euro exekuzio-aurrekontua du –gehi BEZa–, eta obrak errepidearen irisgarritasuna eta segurtasuna hobetzeko balioko dute.
Besteak beste, Sagastan gauzatuko diren aktuazioak hauek izango dira: alde batetik, errepidea konponduko da. Egoera okerrean dago egun, eta berritzeko lanak egingo dira. Bestetik, euri urek sor zitzaketen luiziak ekiditeko helburuarekin, lursail batzuetan urak batzen dituzten arekak konpondu behar dira, urak errekara bideratzeko. Sei partzelatan egingo dira aktuazio horiek, eta Udalak lursailen jabeekin aktuazio horiek egiteko baimena sinatu du jada.
Rafa Bilbao Baserri auzoetako eta Basoetako batzordeburuak “baserri auzoak zaintzearen garrantzia” azpimarratu du. “Herriaren ondareetako bat baserri auzo ugari ditugula da, eta abadiñar asko bizi da auzo horietan. Gerediagan ur-hornidura sarea handitzeko lan egin dugu, eta Irazolan ere berdin egitea aurreikusten dugu. Sagastako lan hauek auzotarren segurtasunean eta irisgarritasunean aurrera pauso garrantzitsuak ekarriko ditu. Legegintzaldi Agendan dugun lan nagusietako bat da, eta lan horiek gauzatzeko urrats handi bat eman dugu lizitazio honekin”, aurreratu du.
Proiektua gauzatzeko interesdunek lizitazioa publiko den unetik 27 egun izango dituzte proposamenak aurkezteko. Lanak aurtengo udaberrian hastea aurreikusten da.
