5 eta 12 urte bitarteko adingabeei zuzendutako jarduera hau 16:30etik 19:30era bitartean egingo da
DURANGO | Haurrei aisialdirako jarduerak eskaintzen jarraitze aldera, Durangoko Udalak uretako puzgarriak izango dituen saio berri bat antolatu du, 5 eta 12 urte bitarteko neska-mutilei zuzendua. Jarduera datorren apirilaren 12an, larunbatean, izango da Landako IIko kiroldegian, 16:30etik 19:30era bitartean.
Proposamen honen helburua herriko txikienei gozatzeko arratsalde atsegin bat eskaintzea da. Parte-hartzea ordu erdiko txandetan antolatuko da, jarduera modu ordenatu eta seguru batean garatzeko.
Jardueran parte hartzeko ezinbestekoa izango da aurrez izena ematea, eta hori Durango Kirolak webgunearen bidez edo Landako IIko harreran egin daiteke. Erreserbak egiteko aukera igerilekuko abonamendu motaren araberakoa izango da:
- Urteko abonamendua: 7 egun lehenagotik (aurreko larunbatetik) erreserbatu daiteke.
- Hiruhilekoko abonamendua: 3 egun lehenagotik (asteazkenetik) erreserbatu daiteke.
- Hileko abonamendua: jarduera egun berean erreserbatu behar da harreran.
- Abonamendurik gabe: eguneko sarrera erosi eta erreserba egun berean egin behar da harreran.
Adingabe bakoitzarekin pertsona heldu arduradun bat egotea ezinbestekoa izango da jarduerak irauten duen bitartean. Halaber, txanda bakoitzaren hasieran, monitoreek puzgarrien erabilera-arauak azalduko dituzte, ingurune seguru eta errespetuzkoa bultzatzeko.
Durangoko Udalak herriko familiei ekintza honetan parte hartzeko gonbita luzatzen die, eta izen-ematea ahalik eta lasterren egitea, plaza kopurua mugatua baita eta erreserbak izen-emate ordenaren arabera esleituko baitira.
