Hilabete osoan zehar, ura ardatz hartuta hausnarketa egitera gonbidatuko ditu herritarrak
AMOREBIETA-ETXANO |
Urtarrileko Berba Lapiko ekimenak ura izango du ardatz, etorkizun jasangarri baten oinarri, eta bat egingo du 2030 Agendaren Garapen Jasangarrirako Helburuekin (GJH). Hala, urteko lehen hilabete honetan, uraren garrantzia azpimarratuko da bizitza duina eta jasangarria bermatzeko funtsezko baliabide gisa.
Berba Lapikok urak gure eguneroko bizitzan eta herrialde jasangarrien garapenean duen garrantzia azpimarratuko du. Gure ingurunea, historikoki ibaiez eta errekaz aberatsa, aldaketa klimatikoaren eraginez ahultzen ari da. Egoera honek agerian utzi du uraren hauskortasuna, bereziki azken urteetan inguruko eskualdeetan izandako lehorteek erakutsi bezala.
Hortik abiatuta eta herritarren kontzientziazioa sustatzeko, Berba Lapikoak liburutegian eskuragarri dauden liburu eta baliabide berezien aukeraketa eskainiko du. Material horiek ura hainbat ikuspuntutatik landuko dute, uraren ingurumen-balioa indartuz, bizitza duinerako duen garrantzia azpimarratuz eta aldaketa klimatikoaren aurkako borrokan duen eginkizuna azaleratuz. Programaren helburua da herritarrei hausnarketarako espazio bat eskaintzea, uraren kudeaketari eta horrek planetan duen eraginari buruz gogoeta egiteko.
Amorebieta-Etxanoko Udalak herritar guztiak gonbidatzen ditu Berba Lapikoren jardueretan parte hartzera eta bertan eskaintzen diren ikaskuntza eta elkarlan aukerak aprobetxatzera.
