Jeltzaleek kritikatu dute, gertakariak behin eta berriz errepikatu arren, Udal Gobernuak ez dituela publikoki gaitzetsi
MARKINA-XEMEIN | EAJ-PNVk kezka agertu du udalerriko hainbat tokitan berriro agertu diren pintaketen aurrean; besteak beste, Udaletxeko fatxadan eta herriko hainbat establezimendutan.
Jeltzaleen ustez, bereziki kezkagarria da gertakari horiek Bizkaibusen aurkako erasoekin batera gertatu izana eta, hala ere, Udalak horien aurkako gaitzespen publiko eta argirik egin ez izana.
“Gertatutakoak asko kezkatzen gaitu, baina baita Udalaren isiltasunak ere. Ez Bizkaibusen aurkako erasoek, ezta pintaketek ere, ez dute gaitzespen publikorik jaso Udalaren aldetik. Horrelako gertakarien aurrean, erakundeek argi jokatu behar dute”, adierazi dute EAJ-PNVtik.
Jeltzaleek gogorarazi dute ez dela soilik garbiketa edo mantentze kontua, baita erantzukizun instituzionala ere. Haien iritziz, zerbitzu publikoen aurkako erasoak gertatzen direnean edo udalerriko eraikin eta establezimenduetan pintaketak behin eta berriz agertzen direnean, Udalak argi erantzun behar du eta gaitzespen mezua zalantzarik gabe helarazi.
EAJ-PNVren ustez, ez da nahikoa pintaketak egin ondoren garbitzera mugatzea, eta berriro gerta ez daitezen neurriak hartzeko eskatu du. Era berean, Bizkaibus zerbitzuarekin lotutako elementuetan nola jarduten ari den berrikustea eta erantzun azkar eta koordinatua bermatzea eskatu du.
“Garbitzea beharrezkoa da, baina ezin da hori izan erantzun bakarra. Arazoa behin eta berriz errepikatzen bada, aztertu egin behar da zer neurri har daitezkeen prebentziorako eta eraginkortasun handiagoz jarduteko”, nabarmendu dute.
“Ezin dugu normaltzat jo eraikin publikoak, saltokiak edo zerbitzu publikoak behin eta berriz kaltetuta agertzea. Jardun egin behar da, prebentzioa landu eta gertakari horiek argi eta garbi gaitzetsi”, gaineratu dute.
Markina-Xemeingo EAJ-PNVren ustez, herria zaintzea bizikidetzaren, errespetuaren eta kudeaketa onaren parte da. Horregatik, horrelako gertakarien aurrean Udalak erantzun argia, eraginkorra eta koherentea ematea eskatzen jarraituko du.
