Olazarmendi Klubeko gimnastak 27 parte-hartzaileren artean irabazi zuen
KIROLAK | Gimnastika erritmikoak asteburu gogoangarria bizi izan zuen Euskadin. Ane Fernández de Arroiabe Olazarmendi Klubeko gimnasta Euskadiko txapeldun izendatu zen gazte mailan, beste 26 aurkariren aurretik sailkatu ostean. Horrez gain, abenduan jokatuko den Oinarrizko Mailako Espainiako Kopan aritzeko bost plazetako bat eskuratu zuen.
Estatuko lehiaketarako sailkapena gero eta lehiakorragoa eta parte-hartzaile gehiagokoa den kategorian lortu du. Izan ere, gero eta gimnasta gehiagok jarraitzen dute kirol ibilbidearekin gazte mailan, eta diziplina, teknika eta heldutasuna adinarekin batera garatzen direla erakusten dute.
Etengabeko lana
23 urte ditu Anek, eta bilakaera horren adibide da. Duela sei denboraldi maila nazionalean lehiatzen hasi zenetik, emozioen kontrola, konfiantza eta tapizeko presioari aurre egiteko gaitasuna landu ditu etengabe. Euskadiko txapelketako urrezko dominak ez du soilik haren zehaztasun teknikoa saritzen; autokontzientzia eta indar mentala lantzeko egindako bidea ere aitortzen du.
Olazarmendi Klubak aldarrikapen garrantzitsu bat nabarmendu du: emakume helduek kirolari gisa aitortuak izateko eta identitate horri eusteko aukera izan behar dute, gizarte-presiorik eta estereotiporik gabe. Puntak jantzi, klubeko txandala soinean hartu eta lehiatzea bizitza osoan lagun dezakeen zaletasun baten adierazpenak dira.
Pasioaren adibide
Euskadiko podiumak beste bi istorio esanguratsu ere utzi zituen:
- Sheila Vílchez (27 urte): Santutxu Klubeko gimnastak bigarren postua lortu zuen. Ane-ren laguna da, eta goi-mailako entrenamenduak entrenatzaile-lanarekin uztartzea posible dela erakutsi du.
- Alaine Domínguez (Xixili Kluba): Bulgarian unibertsitate-ikasketak egiten ari da. Herrialde horretan klub bat bilatu zuen entrenamendu-erritmoari eusteko, eta sailkapen-lehiaketan parte hartzeko propio hartu zuen hegazkina.
Ane, Sheila eta Alainek helduaroan gimnastika erritmikoa bizitzeko modu desberdinak ordezkatzen dituzte, baina mezu bera partekatzen dute: gimnastika ez da gainditzen den etapa bat, baizik eta eraldatzen doan bide bat.
