UCIren C2 kategoriako proba azaroaren 1ean lehiatuko da, 09:00etatik aurrera, eta arratsaldean jarraituko du Bizkaiko Txiki Kopako lasterketekin
URDUÑA | Urduñako Txirrindulari Elkarteak ziklo-krosa ekarriko du berriro hiriko kaleetara datorren azaroaren 1ean, Euskadiko ziklo-kros denboraldiari hasiera emanez. Nazioarteko proba honek C2 kategoria du Txirrindularitzaren Nazioarteko Batasunaren (UCI) egutegian, eta kirol-ikuskizun paregabea eskainiko du asteburu osoan zehar.
Lasterketa nagusiak goizean lehiatuko dira, 09:00etatik aurrera. Bertan parte hartuko dute gizonezkoen zein emakumezkoen Master, Kadete, Junior eta Elite Sub23 mailako txirrindulariek. Kategoria bakoitzaren arabera, kirolariek 4 eta 8 itzuli artean osatu beharko dituzte. Irteera eta helmuga Foru Plazan egongo dira kokatuta, eta sari-banaketa ekitaldia 15:30 inguruan egingo da.
Nazioarteko goiz-tartearen ondoren, igande arratsaldean jarraituko du jaiak, 15:00etatik aurrera. Orduan eskoletako kategoria txikien txanda izango da —benjaminak, alebinak eta infantilak—, Bizkaiko Txiki Koparen barruan.
Txikienen kasuan, zirkuituak Juan de Garayko zelaiak zeharkatuko ditu, eta irteera zein helmuga Gasteizko errepidean kokatuko dira. Horrela, amaiera bikaina emango zaio ziklo-krosak Urduñako hainbat txoko berriro hartuko dituen kirol-egunari.
Trafiko-mozketak
Udalak eta antolatzaileek jakinarazi dutenez, egun horretan zehar trafiko-mozketak izango dira hiriko hainbat gunetan proba igaro ahal izateko. Irisgarritasunari eta garraioari buruzko xehetasun guztiak datorren astean jakinaraziko zaizkie herritarrei.
