Egitaraua ekainaren 4an hasiko da, asteazkena, Durangaldeko Elkarte Artistikoaren eskutik
DURANGO | Euskal Jaiak ate joka ditugu, ekainaren 4tik 15era bitartean udalerria kultur, kirol eta jai-gune bihurtuko duen ospakizunarekin. Egitarauak pertsona guztientzat pentsatutako jarduera sorta zabala eskaintzen du, eta euskal tradizioak, sormenak eta bizikidetzak protagonismo berezia izango dute.
Mireia Elkoroiribe alkateak eta Paule Sanchez Kultura eta Euskara zinegotziak, herriko elkarte ugarirekin batera, nabarmendu dute “helburua da Durango eta durangarrak euskal kulturaren erreferente bihurtzea, bere tradizio eta balioak modu kolektiboan zainduz eta elkarrekin ospatuz. Euskal Jaiak une paregabea dira hori egiteko, herritar guztien parte-hartzea eta konpromisoa ezinbestekoak baitira gure kultura bizirik eta alaitasunez mantentzeko. non 23 elkarte dauden tartean. Jende eta elkarte guztiei esker, jaien ibilbidea 27. edizioa baita aurtengoa gero eta sendoagoa da, eta guretzat hori harro egoteko arrazoia da. Beste behin, eskerrak eman nahi dizkiegu Euskal Jaiak posible egiten dituzten elkarte, ikastetxe eta erakunde publikoen lan nekaezinagatik.”
Egitaraua ekainaren 4an hasiko da, asteazkena, Durangaldeko Elkarte Artistikoaren eskutik Ezkurdin egingo den Haurren Eskolarteko XVI. Marrazki, Pintura eta Eskulan Lehiaketaren erakusketarekin. Egun berean, txikienek “Basatiak” haurrentzako filmaz gozatu ahal izango dute Zugazan, Kurutziaga Ikastolak antolatuta. Lehen Hezkuntzako eta DBHko ikasleek, berriz, “Loraldi Eskola” antzerki emanaldiak eta San Antonio Ikastetxeak San Agustin Kultur Gunean eskainiko duen ikuskizuna ikusi ahal izango dituzte.
Ekainaren 5ean, osteguna, Alpino Tabira Mendizale Elkarteak “Kharut II, la primera ascensión” mendiko dokumentala proiektatuko du, eta amaieran alpinismoaren historiari buruzko solasaldia eskainiko da.
Ekainaren 6an, ostirala, Jolas Egunak programaren baitan, euskal mitologian inspiratutako jarduerak eskainiko dira jolas-gune batean, San Fausto auzoan edo frontoian, eguraldi txarra bada. Eguna amaitzeko, Sugarri fanfarreak lagundutako kalejira alai bat ibiliko da Alde Zaharreko kaleetan.
Asteburuan, ekainaren 7an, larunbatean, Durango Jai Alai Zesta Punta Eskolaren eskutik XXI. Zesta Punta Txapelketako finalak eta Durango Pelota Zale Klubak Ezkurdiko frontoian antolatutako Euskal Pilota Maratoia nabarmenduko dira. Aldi berean, kaleak musikaz eta euskal tradizioz beteko dira: Tronperri Dantza Taldearen dantza erakustaldiekin eta Silboberri Txistu Elkartearen eskutik, Nafarroako Orkestra Sinfonikoarekin eta Ortzadar Euskal Folklore Taldearekin batera eskainiko den Durango Hiria txistu-kontzertuarekin.
Ekainaren 8an, igandea, “Peter Memoriala”-ren XIII. Pilota Txapelketako hainbat kategoriatako finalak ospatuko dira, baita Pilota Eguna ere, zeinetan partida ugari jokatuko diren egun osoan zehar, Durangoko Pilota Klubari esker.
Atsedenaldi labur baten ondoren, ekainaren 12an, osteguna, eskola jarduerak itzuliko dira: itsas jolasekin Lehen Hezkuntzako 6. mailako ikasleentzat, eta jolas tradizionalekin 4. mailakoentzat. Gainera, Oihan Vega-ren euskal musikaren emanaldia izango da DBHko 1. zikloko ikasleentzat, San Jose Jesuitak Ikastetxeak, Landako Eskolak eta Nevers Ikastetxeak antolatuta.
Ekainaren 13an, ostirala, Jolas Egunak programaren baitan, umeentzako kimika tailerrak egingo dira, Xabier Irujok euskal diasporari buruzko hitzaldia emango du eta Herri Maite Akordeoi Taldearen kontzertua izango da Kurutsesantu Museoan.
Ekainaren 14an, larunbata, artisautzari eta herri-giroko elkarbizitzari eskainiko zaio, Eixu Artisau Elkartearen eskutik Andra Marin egingo den artisautza azoka eta tindagai naturalen erakustaldiarekin. Durangoko Alde Zaharreko tabernariek antolatutako Kuadrillen Egunean, herriko kuadrillek eguna triki-poteoarekin, euskal dantzekin, tokiko produktuekin egindako kazolekin, bazkari herrikoiekin, batukadekin eta fanfarreekin alaituko dute.
Azkenik, ekainaren 15ean, igandea, Euskal Jaiei amaiera emango zaie Arte eta Historia Museoan egingo den Julene Azpeitia lehiaketaren sari-banaketa ekitaldiarekin. Ondoren, kalejira eta dantza-erakustaldia egingo dira kale eta plaza nagusian zehar, Jaizale Durangaldeko Txistulari Elkartea, B. Ertzila Musika Eskolako Txistulariak, Txoritxu Alai, Tronperri eta Kriskitin Dantza Taldea parte hartzaile direla. Amaitzeko, Tabirako Musika Bandak kontzertua eskainiko du Andra Mari elizpean, jaiei amaiera bikaina emanez.
Ordutegiei eta tokiei buruzko informazio gehiago nahi izanez gero, kontsultatu Udalaren kanal ofizialak.
