Ponpaketa-sistema berri bat instalatuko da, euri-ura hustutzeko
AMOREBIETA-ETXANO | Udalak Zubikurtxe eta Zubipunte auzoak lotzen dituen lurpeko pasabidean, trenbidearen azpian, pilatutako euri-ura ateratzen lagunduko duen drainatze-sistema berria jartzeko lanak jarriko ditu martxan aste honetan.
Gaur egun, euri asko egiten duenean eta Ibaizabal ibaiaren maila igotzen denean, pasabide horretako ura ezin da ondo atera, ur-mailak berdintzen direlako. Horren ondorioz, ura pilatzen da pasabidean, eta batzuetan ezin da gurutzatu, ez oinez, ez autoz ere.
Esku-hartze honekin, Udalak arazo horiek saihestu nahi ditu, batez ere euri asko egiten duen egunetan, eta pertsona guztientzako pasabide seguruagoa eta irisgarriagoa bermatu nahi du.
Horretarako, sistema berriak pasabidean pilatutako ura udalerriko euri-uren sarera azkar ateratzeko ponpa automatikoak izango ditu. Gainera, egungo drainatze-sistemaren zati bat egokituko da, eta sistema modu egokian kontrolatu eta mantentzeko ekipoak jarriko dira. Esku-hartze horren kostua 75.000 eurokoa izango da (BEZ kanpo).
Lanek bi hilabete iraungo dute gutxi gorabehera, eta inguruko bizilagunei ahalik eta eragozpen gutxien sortzea da helburua. Hala ere, lan horiek unean uneko mozketak edo pasabide-mugak eragin ditzakete; hala den kasuetan, Udalak behar denean jakinaraziko ditu aldaketa horiek.
Amorebieta-Etxanoko Udalak herritarren pazientzia eta laguntza eskertzen ditu obrak egiten ari diren bitartean; lanek hobekuntza handia ekarriko baitute uholdeak saihesteko eta eremu hori guztiontzat seguruago egiteko.
