Gainera, merkurioa igo eta 20 gradura iritsiko da eskualdean
EGURALDIA | Datozen orduak eta egunak egonkorrak izango dira, euririk, hotzik eta haizerik gabe. Iragarpenen arabera, depresioak egun batzuetarako urruntzen dira, datorren astearen erdialdera arte. Gainera, merkurioa igo eta 20 gradura iritsiko da Durangaldean.
Ostiralaren lehenengo partean hodeiak izango dira nagusi oraindik, batez ere ekialdean. Iparraldean euri txikia egingo du, bereziki ipar-ekialdean. Arratsaldean atertu egingo du eta ostarteak zabalduz joango dira. Egunaren amaieran zerua hodei gutxirekin geratuko da. Tenperatura maximoak gutxi igo eta 10 eta 15 ºC artekoak izango dira. Egunaren hasieran mendebaldeko haize ahula ibiliko da, gero iparraldera aldatuko da eta azken orduetan aldakor ibiliko da.
Zapatua
Larunbatean eguraldia egonkorra eta eguzkitsua izango da. Zerua hodei gutxirekin egongo da, goi-hodei batzuekin. Goizean goiz lainoa agertuko da eta barnealdeko zenbait lekutan kostako zaio jasotzea. Egunaren hasieran hotza egingo du eta hegoaldeko zenbait lekutan izotza egingo du. Tenperatura maximoak nabarmen igoko dira. Haize ahula eta aldakorra ibiliko da, hego-osagaia nagusi, arratsaldean izan ezik, orduan haizeak iparraldetik joko du.
