140.118 euroko inbertsioarekin eta hiru hilabeteko lanen ostean, espazio berriak udako aisialdirako aukera berria eskaintzen du
DURANGO | Tabirako haur-parkearen ondoan sortutako ur-jolasen gune berriaren obrak amaitu dira eta dagoeneko erabilgarri dago. 110 metro koadroko azalera duen espazio hau Durangoko familientzat diseinatu da, udako hilabete beroenetan aire libreko aisialdirako aukera seguru eta atsegina eskaintzeko.
Parke berriak hainbat txorrota eta ur-joko biltzen ditu, ingurune seguru eta irisgarri batean jolasteko eta freskatzeko aukera emanez. Gainera, ura aurrezteko sistema berritzaile bat ezarri da, ur-kontsumoa bi herenera arte murrizteko gai dena, baliabide hidrikoen erabilera arduratsua eta jasangarria sustatuz.
Lan horiek Arrizabal Elkartea S.L. enpresak gauzatu ditu, 140.118 euroko aurrekontuarekin (BEZa barne) eta hiru hilabeteko exekuzio-epearekin. Proiektu honek bizilagunen eskaera bati erantzuten dio, eta Durangoko Udalak espazio publikoak hobetzeko eta ingurumenarekiko begirunea duten eremu inklusiboak sortzeko duen konpromisoaren baitan kokatzen da.
Ur-jolasen gune berriak bat egiten du herritarren gozamenerako pentsatutako beste espazio batzuekin, hala nola Otamotzenako ur-parkearekin edo Tabirako igerilekuekin, eta uda osoan zehar topagune bihurtzea du helburu.
