Termometroak 35 gradura hurbilduko dira eta abisu horia aktibatuko da
EGURALDIA | Ostegunean uda garaiko eguraldiak jarraipena izango du, eta barnealdean beroa zakartu egingo da. Tenperatura gehiago igoko da, batez ere hegoaldean. Ipar partean brisa ibiliko da eta ondorioz, bertan termometroa ez da horrenbeste igoko. Oro har, 30 ºC-tik gora joango dira maximoak, kostaldean izan ezik; Arabako eta Nafarroako toki askotan 35 ºC-ra heldu eta muga hori hautsi dezakete. Zerua oskarbi egongo da eguneko ordurik gehienetan, soilik goi-hodei finak agertuko dira.
