Eusko Jaurlaritzak antolatutako hitzorduak orientazio praktikoa eskaintzeko balio izan du
DURANGO | Inoiz ez bezalako ekitaldia izan da gaur goizean Landako Gunean: ikasturte honetan Erasmus+ programan parte hartuko duten Lanbide Heziketako euskal ikasleen lehen topaketa bateratua. Ikastetxe publiko eta itunduetako 800 ikasle bildu dira nazioarteko mugikortasunari ekin aurretik, “Mugitu, ikasi eta bizi” lelopean Eusko Jaurlaritzak bultzatutako jardunaldi batean, zalantzak argitzeko eta orientazio praktikoa eskaintzeko Europako hainbat lekutara joan aurretik.
Begoña Pedrosa Hezkuntza sailburua izan da ekitaldiaren buru, eta euskal LH nazioartekotzeko estrategia iraunkor baten barruan kokatu du hitzordua. “Hezkuntza lan baterako prestatzea baino gehiago da; erantzukizunaren eta bizikidetzaren balioak sustatzea da. Balio horiek irudikatu beharko dituzue, Euskadiko enbaxadoreak zaretelako“, adierazi du. Pedrosak azpimarratu du programa tresna “demokratikoagoa” bihurtu dela, eta defendatu du “ezagutzak ez duela mugarik”, Euskadik etorkizunerako talentua behar duen testuinguruan.
Bolondresak
Erakundeetatik haratago, jardunaldiak izaera praktiko nabarmena izan du. Joan den ikasturtean herrialde horietan egonaldia egin zuten 28 ikaslek boluntario gisa jardun dute helmugen araberako mahai-inguruetan. Bertan, beren esperientzia partekatu dute eta hegaldiekin, ostatuarekin, hizkuntzarekin, mantenuarekin edo kudeaketa ekonomikoarekin lotutako galderei erantzun diete.
