35.988.500 euroko aurrekontua onatu Udalak, inbertsioa % 6,36 handitu du aurreko urtearekin alderatuta
AMOREBIETA-ETXANO | Amorebieta-Etxanoko Udalak 2026ko aurrekontu dokumentua onartu du gaur goizean egindako osoko bilkuran, eta horrek datorren urteko udalerriko jardun-ildo nagusiak markatuko ditu. Familiek duten papera indartzen duen baliabide-ekarpenarekin, udalerriaren etorkizun iraunkorraren aldeko apustua eginez eta zerbitzu publikoen kalitatea sendotuz, aurrekontuak Udalaren konpromisoa erakusten du hurbila, eraginkorra eta zornotzarren benetako beharrei erantzuteko pentsatutako kudeaketa baten aldekoa.
Ainhoa Salterain Alkateak azpimarratu du “Amorebieta-Etxano bizitzeko lekurik onena izaten jarrai dezan nahi dugu, eta horretarako, pertsonak erdigunean jartzen dituzten aurrekontuen alde egiten jarraitzen dugu, egunerokoa hobetzen dutenak eta etorkizunerako prestatutako udalerri bat irudikatzen dutenak”.
Horrela, 35.988.500 euroko kopurura iritsita, Udalak garapen orekatu, parte-hartzaile eta iraunkorraren aldeko apustua berretsi du. Kopuru hori %6,36 hazi da aurreko urtearekin alderatuta eta Udalaren konpromisoa sendotzen du, zerbitzu publikoen etengabeko hobekuntzarekin, tokiko azpiegituren indartzearekin eta herritarren partaidetzarekin aldaketarako indar eragile gisa.
Aurrekontuak 3,5 milioi euro baino gehiagoko inbertsioak jasotzen ditu, eta horiei esker proiektu estrategikoak abiatuko dira: Karmen kalearen berrurbanizazioa, erabilera anitzeko gunearen amaiera Urgozon, Arkalaz prozesuaren baitan garatuko den “Ametsetatik Herrira” plan parte-hartzailea eta familia-gunerako aisialdi espazio berriak, hala nola splash park bat. Era berean, indartu egingo dira kultur, kirol eta auzo elkarteentzako laguntza-lerroak.
Zornotzar familiak, aurrekontuaren erdigunean
Zornotzar familiak jarraitzen dute Udalaren jardunaren erdigune izaten. Aurrekontuaren erdia euren eguneroko ongizatea hobetzeko eta komunitate-loturak sendotzeko neurrietan jarriko da. Aisialdirako gune berriak sortuko dira, hala nola haurrentzako splash park bat skate parkaren inguruan, eta merenderoak zein atseden-eremuak prestatzen jarraituko da.
Era berean, espazio publikoa zaintzen jarraituko da, hiri-altzariak berrituz, argiztapena hobetuz eta kalitate estandarrak mantenduz. Ekintza hauek Udalaren bi enplegu programen bidez bultzatuko dira, eta horien bidez udalerriko langabeen laneratzea ere sustatuko da.
Arkalaz: Amorebieta-Etxanoko etorkizuna irudikatzeko partaidetza aktiboa
Arkalaz prozesuak Udalaren apustu handienetako bat izaten jarraitzen du, udalerria elkarlanean eraikitzeko eta gogoeta partekaturako espazio gisa. 2026an, esparru horretan, Ametsetatik Herrira bultzatuko da, Amorebieta-Etxanoren etorkizuna definitzea helburu duen ekimen estrategiko eta parte-hartzailea.
Halaber, Arkalaz ekimenaren baitan, gazteek protagonismoa izaten jarraituko dute. ZUOK programaren aldeko apustua sendotuko da, auzotaxi zerbitzua zabalduko da eta eurek sortutako gazteentzako online informazio-ataria finkatuko da.
Hirigintzako eraldaketa etorkizuneko proiektuekin
Udalak 2026an amaituko ditu Urgozon egiten ari diren erabilera anitzeko espazioaren lanak. Gune honek zerbitzu hobeak eskainiko dizkie herritar guztiei, eta bertako elkarte-sareari lekua emango dio.
Bestalde, Karmen kalearen berrurbanizazioa izango da urteko proiektu nagusietako bat. Esku-hartze horrek erdigunea eraldatuko du jasangarritasun eta irisgarritasun irizpideekin, airearen kalitatea hobetuz, itzal-gune gehiago sortuz eta oinezkoentzat zein familientzat ingurune osasuntsuagoa, seguruagoa eta atseginagoa eskainiz.
Kultura, kirola eta bizitza soziala: zornotzarren nortasuna
Kultura, kirol eta jai arloko programazioa anitza eta sendoa izaten jarraituko du herriko elkarteen eskutik. Guztira, milioi 1 euro baino gehiago bideratuko da tokiko elkarte-sareari laguntzeko, honakoak nabarmenduz:
- 000 € kirol-elkarte eta klubentzat.
- 000 € gizarte-izaerako elkarteentzat, AIDAE-ri emandako laguntza azpimarratuz.
- 000 € merkataritza, ostalaritza eta lehen sektorea bultzatzeko.
- 800 € ikastetxeentzat, Eskola Bideak bezalako proiektuekin jarraitzeko.
- 150 € kultura-elkarteentzat.
- 450 € auzo-elkarteentzat.
Diru-laguntza hauek elkarteek Amorebieta-Etxanoko herri-bizitzan duten funtsezko papera indartzen dute.
Alkateak nabarmendu nahi izan duenez, “2026ko aurrekontuek ez diete soilik gaur egungo beharrei erantzuten, baizik eta etorkizuneko erronketarako prestatzen dute udalerria: konpromisoarekin, hurbiltasunarekin eta pertsonen zornotzarren bizitza hobetzen duen inbertsio arduratsuarekin”.
