Igandean amaituko da, 16:00ak aldera, berriztar zirkuituan Iñaki Lejarreta
TXIRRINDULARITZA | Dena prest Iñakiren Bideak-en edizio berri baterako, eta dagoeneko hamabi doaz. Larunbat goizaldean hasiko da Iñaki Lejarreta kirolaria omentzeko jaio zen BTT proba, Elizondo plazatik (irailaren 7an, 04:00etan). 2012ko abenduaren 16an hil zen, zorigaiztoko istripu batean. Aurten ere, herri eta lurralde desberdinetatik igaroko da proba, Euskal Herria bizikletaz zeharkatzeko. Bederatzi etapatan banatuta, Iñakiren omenezko proba igandean amaituko da, 16:00ak aldera, bere izena daraman zirkuitu berriztarrean.
Parte-hartzaileak, senideak, lagunak eta mendiko bizikletazaleak, bizikletan igoko dira etapaka eta 430 kilometro inguruko erreleboka egiteko. “Tarte bakoitzeko arduradunek Iñakiren Bideak identifikazio-maillota eramango dute. Garrantzitsua da ibilbidearen arduradunen aurretik ez joatea. Formatua non stop eta txandaka izango da: dagokion tarteaz arduratzen den talde bakoitzak maillota eta besokoa eramango ditu, hurrengo taldeari irteera emateko lekuko gisa. Erreleboa 3-4 laguneko talde batek emango du “, azaldu dute antolatzaileek.
