Atxilotuaren etxean 134 gramo speed eta 3.550 euro atzeman zituzten, Ertzaintzaren arabera
AMOREBIETA-ETXANO | Ertzaintzak astearte honetan jakinarazi duenez, urrian hasi ziren Durangoko ertzain-etxeko agenteak Zornotzan bizi den pertsona baten jarduerak ikertzen, hainbat informazio bildu baitzuten gizon hori substantzia estupefazienteen trafikoan inplikatuta egon zitekeela adierazteko.
Poliziaren arabera, ikerketei esker egiaztatu ahal izan zuten susmagarriak diru-trukeak egiten zituela bide publikoan eta herriko ostalaritza-establezimendu batean.
Azkenik, atzo goizean, ikertua atxilotu zuten Zornotzan, eta substantzia estupefazientedun poltsa bat eta 670 euro aurkitu zizkioten, Segurtasun Sailak jakinarazi duenez. Ordu batzuk geroago, etxean sartu eta miatu zuten, eta 120 gramo speed zituen poltsa bat eta substantzia bereko beste 14 poltsatxo (gramo bat, gutxi gorabehera) konfiskatu zizkioten. Halaber, 3.550 euro eta doitasuneko bi baskula okupatu ziren. Atzemandako droga 148,6 gramokoa da guztira, eta 4.000 eurotik gorako balioa izango luke legez kanpoko merkatuan. 52 urteko atxilotua epailearen esku utzi dute gaur eguerdian.
