«Orain arte dena gure asmoen aurkakoa izan da, bai enpresaren aldetik, bai udalaren aldetik», salatu dute.
ELORRIO | Elorrioko Udal Kiroldegiko langileek 17 hilabete baino gehiago daramatzate lan baldintza «duinak» lortzeko mobilizazioekin. Testuinguru horretan, joan den maiatzean, LAB, CCOO eta UGT sindikatuek sektoreko hitzarmen bat sinatu zuten, eta langileen iritziz, «ez zen iristen sektorea duintzeko adinako edukiekin».
Azaldu dute, besteak beste, sektoreko hitzarmen berriak ez duela bermatzen sektorearen erosteko ahalmenari eustea, eta ez duela hobekuntzarik aurreikusten sektoreko langileentzat oso garrantzitsuak ziren gaietan.
Gauzak horrela, orain erabaki dute, ELA sindikatuarekin batera, euren borroka Elorrioko kiroldegirako zentroko hitzarmen propio bat lortzea izatea.
Azaldu dutenez, 20 langile inguruk osatzen dute plantilla: «20 horietatik 15ek ez dute kobratzen hilean 1.000 euro askorengatik, bi langilek bakarrik dute lanaldi osoa, gastuak merkatzeko Elizaldeko instalazioak ireki nahi dituzte 3 sorospenekin, eta aurten arte 5 sorosle ziren, eta kontuan izan behar dugu instalazioak 1400 lagunentzako tokia dutela».
«Orain arte dena izan da gure asmoen aurkakoa, bai enpresaren aldetik, bai udalaren aldetik. Elorrioko udal kiroldegiko langileek baldintza duinak baino ez dituzte nahi. Ez dugu ulertzen zergatik garen Elorrioko udal-zentro bakarra, 2024. urtean egonda, oraindik udal-plantillaren antzeko baldintzak izateko argi-urteetara dagoena, edo, gutxienez, gure soldatak urtez urte KPIarekin berrikusteko eskubidea ukatzen diguna, kontuan hartuta soldatak abiatzen garela», salatu dute.
Datorren ekainaren 10erako manifestazioa antolatu dute Herriko Plazatik Elizalderaino.
