Taldeak azpimarratu du ez dagoela datu horiek ematea justifikatzen duen “segurtasun-arrazoi objektiborik”
DURANGO | EH Bildu udal taldeak mozio bat aurkeztu du Udalbatzan, Alkatetzari eskatuz atxilotuen jatorriari buruzko datuak publiko egin ez ditzan. Formazioaren ustez, datu horiek emateak azken hamarkadetan segurtasun politikan egon den “kontsentsu zabala” hausten du.
Mozioaren testuak azaltzen duenez, delitua egin duenaren jatorria zabaltzeak modu negatiboan eragin dezake herritarren pertzepzioan. EH Bilduk ohartarazi duenez, jokaera konkretuengatik “kolektibo osoak susmagarri gisa” hautematea ekar dezake horrek. Gainera, adituen arabera, jatorriak gutxi laguntzen du delitu baten zergatia azaltzen, bestelako faktore sozioekonomikoen aldean.
Taldeak azpimarratu du ez dagoela datu horiek ematea justifikatzen duen “segurtasun-arrazoi objektiborik”. Euren esanetan, atxilotuen jatorria publiko egiteak ez dakar inolako hobekuntzarik durangarren segurtasunean. Hori dela eta, lehenbailehen lehengo adostasunera itzultzea premiazkoa dela deritzote.
