Hemendik aurrera, lau agente soilik arituko dira indarkeria matxistako kasuak artatzen
DURANGO | Durangoko Ertzain-Etxeak aurrerapauso garrantzitsua eman du genero-indarkeriaren aurkako borrokan, bere unitate espezializatua indartuz. Hemendik aurrera, lau agente izango dira soilik indarkeria matxistako kasuak artatzen, aurretik esleitutako bi agenteekin alderatuta igoera bat eginez. Honek tokiko elkarteen eskaera bati erantzuten dio, eta genero indarkeriaren salaketen arreta eta jarraipena hobetzea du helburu.
Eduaro Olaizola, Durangoko Ertzain-Etxeko komisarioak, nabarmendu zuen langileen gehikuntza funtsezkoa dela biktimei zerbitzu hurbilagoa eta espezializatuagoa emateko. Haren hitzetan: “Ertzaintza osoa prestatuta dago genero-indarkeriako egoerei erantzuteko, baina agente kopuruaren gehikuntza honen bidez, esku-hartzeko gaitasuna, jarraipena eta biktimentzako arreta hobetu nahi ditugu, prozesu seguruagoa eta eraginkorragoa bermatzeko.”
Josune Escota, Durangoko Udaleko Herritarren Segurtasuneko zinegotzi arduradunak, berriz, errefortzu honen garrantzia azpimarratu du, adieraziz: “Tokiko elkarteekin lankidetzan aritzea funtsezkoa izan da indarkeria matxistaren biktimen behar espezifikoak ulertzeko. Ertzaintzaren unitate espezializatua handitzea eskaera horiei zuzenean erantzutea da, eta beste urrats bat da Durangon eta eskualdean pertsona guztientzako ingurune seguruagoa sortzeko bidean.”
Errefortzu hau Ertzaintzaren eta Durangoko Udaltzaingoaren elkarreko ahaleginaren baitan kokatzen da, genero-indarkeriaren aurka borrokatzeko eta biktimek laguntza egokia jasoko dutela bermatzeko. Horrek esku-hartzeko eta jarraipena egiteko gaitasun handiagoa bermatzen du, eta hori funtsezkoa izango da prozesuaren fase bakoitzean biktimei laguntza hobea emateko.
Neurri honekin, Durangok eta Durangaldeak beste urrats bat eman dute indarkeria matxista desagerrarazteko eta biktimei laguntza hurbilagoa, zuzenagoa eta espezializatuagoa emateko konpromisoan, herritar guztientzako ingurune seguruagoa, bidezkoagoa eta berdintasunezkoagoa eskaintzeko helburua indartuz.
