Hurrengo pausoa proposamen horietan oinarritutako jarduerak zehaztea eta burututako ekintzen aurrerapenaren berri ematea izango da
DURANGO | “Auzoekin Batera” partaidetza-prozesua oso positiboki baloratu du Durangoko Udal Gobernuak, herriko 7 auzotan egindako topaketetan herritarren 93 proposamen jaso direlako. Entzute aktiboan oinarritutako prozesu honek herritarren kezkak eta iradokizunak jasotzea du helburu, haien ingurunea hobetzeko, eta, orain arte, oso harrera ona izan du durangarren aldetik.
Topaketak Tabira, San Fausto, San Roke, Madalena, Landako, Erdialdea eta Juan de Itziar auzoetan egin ziren, eta bertan auzotarrek beren beharrak eta hobekuntza-proposamenak plazaratu zituzten. Guztira, 15 proposamen jaso ziren Tabiran, 14 San Fauston, 8 San Roken, 20 Madalenan, 14 Landakon, 8 Erdialdean eta 14 Juan de Itziarren.
Herritarrek gehien partekatu dituzten proposamenen artean udalerriko kale eta gune ezberdinetako argiztapena hobetzea, kaleen garbiketa areagotzea, bide-segurtasuna eta irisgarritasuna hobetzea nabarmentzen dira. Horrez gain, parkeetan banku eta paperontzi gehiago jartzeko eskaerak, zenbait eremutan udaltzainen presentzia indartzea eta haur-parkeen azpiegiturak hobetzea ere aipatu ziren.
Auzo zehatzei dagozkien proposamen batzuk ere jaso ziren. Esaterako, Tabiran, auzotarrek minibusa erabili ahal izatea eskatu zuten zerbitzua martxan jartzen denean, eta barruko kale batzuetan trafikoa birantolatzea. San Roken, transferentzia-zentroari beste kokapen bat bilatzea proposatu zen. San Fauston, berriz, hiriberritzea, berdeguneen zaintza eta oinezkoentzako guneetako argiztapena hobetzea izan ziren proposamen nagusiak. Madalenan, parkeko bankuak egurrez estaltzea eta lorategien eta espaloien mantenua hobetzea eskatu zen. Azkenik, Juan de Itziarren, hiri-altzariak berritzea eta aisialdiko zein kulturako jarduera gehiago antolatzea proposatu zuten.
Horrez gain, proposamen garrantzitsu batzuk aurkeztu dira, hala nola, udalerriaren zenbait guneetan komunak jartzea, industria-usainak kudeatzea eta hiriko hainbat lekutan LED informazio-pantailak instalatzea. Irisgarritasuna hobetzeko ekintzak ere eskatu dira Zuhatzola eta Pinondo auzoetan, esaterako, zoladura egokitzea eta herritarrentzat aisialdirako eguzkitako aulki finkoak jartzea.
Durangoko Udalak eskerrak eman dizkie parte hartu duten herritar guztiei, auzoak hobetzeko erakutsitako inplikazio eta prestutasunagatik. Hurrengo pausoa jasotako proposamenetan oinarritutako jarduerak zehaztea izango da, eta egindako ekintzen aurrerapenen berri ematea.
Alkateak, Mireia Elkoroiribe, prozesu honek udal arduradunen eta durangarren arteko komunikazio-kanal zuzen eta eraginkor bat sendotzeko duen garrantzia azpimarratu du. “Prozesu aberasgarria izan da oso. Legegintzaldi-planaren helburuetako bat herritarrekin eta tokiko eragileekin topaketak egituratzea da. Udala eta herritarrak norabide berean goazela sentiaraztea da gure helburua. Elkarrizketa zuzena ezarri dugu durangarrekin, proposamen asko jaso ditugu eta orain aztertu eta ekiteko unea da”, adierazi du Elkoroiribek.
Herritarren parte-hartze aktiboa funtsezko ardatz izaten jarraitzen du Durangoren etengabeko hobekuntzan, eta Durangoko Udalak Auzoekin Batera prozesuarekin duen konpromisoa berresten du, auzotar guztien ahotsak udalerria eraldatzeko eta aurrera egiteko eragile nagusi izaten jarrai dezaten.
