Topaketa 18:00etan izango da, Elkartegian
DURANGO | Datorren astelehenean, irailak 22, 18:00etan, Elkartegian, Auzoen Ordezkaritza Mahaiaren lehen Topaketa Parte-hartzailea egingo da, Durangoko jaietan oinarrituta. Saioa elkarrizketarako gune ireki bat izango da, non herritarrek jai programazioaren inguruko proposamenak, iradokizunak eta balorazioak partekatuko dituzten.
Topaketa hau Segurtasunerako eta Bizikidetzarako Herritarren Mahaiaren egitasmoaren baitan kokatzen da. Mahai hau irailean sortu zen, herritarren parte-hartzea indartzea eta gai hauen inguruko erabakietan herritarren ekarpenak jasotzea helburu duen espazio gisa. Mahaiak Durangoko gizartearen ordezkari zabal bat du osagai: udal ordezkaritza duten alderdi politikoak, auzo elkarteak, emakumeen kolektiboak, ikastetxeetako guraso elkarteen ordezkariak, merkatariak, ostalariak eta kolektibo kalteberak. Horrez gain, interesa duen edonork zuzenean parte hartu dezake.
Lan-eremu honen funtzionamendua bi mahai bereiziren bidez egituratzen da: Auzoen Ordezkaritza Mahaia, tokiko administrazioaren eta herritar antolatuen arteko lankidetza egonkorra sustatzen duena, eta Herritarren Mahai Zuzena, biztanleriaren parte-hartze zuzena errazteko bideratua, inolako erakunde edo kolektiboko parte izan gabe.
Lehen topaketa hau, gainera, Auzoen Ordezkaritza Mahaiaren lehen esperientzia praktikoa izango da. Durangoko jaietan oinarrituko da eta jasotako ekarpenak kontsultarako erabiliko dira, jaiek herritar guztien nahi eta beharrei erantzuteko.
Josune Escota, Segurtasuneko zinegotziak adierazi duenez: “Espazio hauen garapena garrantzitsua da Udalak sustatzen duen entzute aktiboaren alorrean. Herritarren inplikazioa zenbat eta handiagoa izan, orduan eta aberasgarriagoa izango da. Zenbat eta ahots gehiago entzun, orduan eta adierazgarriagoak izango dira gure jaiak.”
Udalak dei egiten die tokiko jaiak hobetu eta aberastu nahi dituzten pertsona guztiei topaketara joan daitezen eta beren ikuspegia eman dezaten.
Parte hartu edo informazio gehiago lortu nahi dutenek mezu bat bidali dezakete idazkaritza@durango.eus helbide elektronikoaren bidez.
