Asteazkenean, hilak 25, hasiko diren oroitzapenezko ekitaldiak egingo dira.
DURANGO | Durango eta Montevideo senidetu zirela bi urte betetzen direnean, hiriak eta Uruguaiko hiriburuak beste urrats bat emango dute datorren larunbata, irailak 27, senidetzearen ospakizun-egun gisa ezarriz, Montevideo eta Durangoren arteko lotura kultural eta sozialak berretsiz. Horregatik, irailaren 25, 26 eta 27an hainbat oroitzapen-ekitaldi egingo dira. «Ohore handia da irailaren 27a Durango eta Montevideoren arteko senidetzearen ospakizun-egun gisa finkatzea. Bruno Mauricio Zabalaren bitartez gure historia partekatua aitortzeaz gain, bi hirien arteko lotura kultural, ekonomiko eta sozialak indartzeko aukera ere bada hitzarmen hau. Kultura, turismoa eta proiektu bateratuen garapena bezalako arlo garrantzitsuetan elkarlanean aurrera egiteko aukera ematen digu “, azaldu du Mireia Elkoroiribe alkateak programa oroigarria aurkezteko prentsaurrekoan.
Ekitaldiak irailaren 25ean, asteazkenean, hasiko dira, udal osoko bilkurari irailaren 27a bi hirien arteko senidetzea ospatzeko egun gisa ofizialki ezartzeko proposamena aurkeztuz.
Irailaren 26an, ostegunean, 20:00etan, ekitaldi bat egingo da Andra Mari Basilikako elizpean. Zeremonia honetan Durangoko kultur eragileek parte hartuko dute, bertsolari, txalaparta, Orfeoi Durangarra, Kriskitin eta tangoko dantzarien emanaldiekin. Aurretik, 18:00etatik 20:00etara, Eingo taldeak kalejira egingo du alde zaharrean eta Ezkurdi plazan, bi kulturetako musika tradizionalarekin alaituz.
Programa irailaren 27an amaituko da, Durango Irratian elkarrizketa bat eginez. Bertan, Montevideoko Saileko Batzordeko lehendakari Patricia Soria eta Durangoko alkate Mireia Elkoroiribe izango dira, senidetzearen inguruko hausnarketak partekatzeko. Elkarrizketa www.durango.eus webgunean egongo da eskuragarri.
“Durangoko herritarrak harreman horren parte sentitzea eta programatutako jardueretan aktiboki parte hartzea nahi dugu. Lotura horrek mugak gainditzen ditu, eta elkarrekin ikastera eta haztera gonbidatzen gaitu, gure euskal nortasuna beste latitude batzuetara eramanez», animatu du Elkoroiribek.
Senidetzea
Durangoko Udalak 2022ko irailaren 27an sinatu zuen Montevideo hiriarekin (Uruguai) senidetzeko akordioa. Montevideoko Saileko Batzordearen eta Durangoko udalerriaren arteko lankidetza-hitzarmen kultural hau sinatuta, bi herrien arteko kultura- eta giza trukea bultzatuko duen lankidetza-harremana ezarri nahi izan zen, «Durango marka» mugetatik haratago eramanez.
Senidetze hau Bruno Mauricio Zabalaren irudi historikoan oinarritzen da, Montevideo hiriaren sortzailea eta Durangokoa. Hala ere, akordioak askoz ere irismen handiagoa du, kultura eta artearen esparruetan esperientziak eta jardunbide egokiak trukatzea sustatzen baitu, bai eta turismoa sustatzea eta Durangoko herritarrak inplikatzen dituzten baterako proiektuak garatzea ere. Horrela berretsi zen maiatzean udalbatzako ordezkariek Montevideora egindako bisita.
