Maiatzaren 15etik ekainaren 16ra bitartean bonoa.durango.eus webgunean eskuratu ahal izango dira edo 65 urtetik gorako pertsonentzat Turismo Museoan
DURANGO | Udalak, Dendak Bai merkatarien elkartearekin elkarlanean, bonu-kanpaina berria jarriko du martxan herriko merkataritza txikia, ostalaritza eta zerbitzuen sektorea sustatzeko asmoz. Ekimen honek 10.000 bonu jarriko ditu herritarren eskura, eta Udalak 50.000 euroko ekarpena egingo du horretarako.
Bonuak maiatzaren 15eko 9:00etatik ekainaren 16ra bitarte, biak barne, bonoa.durango.eus webgunearen bidez eskuragarri egongo dira. Halaber, Turismo Bulegoan ere eskuragarri egongo dira.
65 urtetik gorako pertsonentzat, eta arrakala digitala saihesteko helburuarekin, erosketa presentziala antolatu da maiatzaren 15ean eta 16an Durangoko Turismo Bulegoan, 10:00etatik 14:30era bitarteko ordutegian.
Beraz, bonuen salmenta honela antolatuko da:
- Durangon erroldatutako pertsonak, online salmentan lehentasuna dutenak: maiatzaren 15etik 18ra, kanpaina osoan zehar bonuak erosteko aukera izango dute edo horiek amaitu arte.
- 65 urtetik gorako pertsonak: maiatzaren 15ean eta 16an, Turismo Bulegoan.
- Edozein pertsona, erroldatua zein erroldatu gabea, eta 18 urtetik gorakoa: online maiatzaren 19tik aurrera, eta aurrez aurre Turismo Bulegoan (asteartetik ostiralera, 10:00etatik 14:30era).
18 urtetik gorako pertsona bakoitzak gehienez 4 bonu eskuratu ahal izango ditu NAN bakoitzeko. Bonu bakoitzak 15 euroko balioa izango du: erabiltzaileak 10 euro ordainduko ditu eta 5 euro Udalak jarriko ditu. Bonua erabiltzeko, gutxienez 15 euroko erosketa egin beharko da. Bi bonu bateratu daitezke erosketa berean, baldin eta gutxienez 30 euroko gastua egiten bada. Saltoki bakoitzak gehienez 200 bonu trukatu ahal izango ditu.
Jesica Ruiz Durangoko Udaleko Merkataritza zinegotziak adierazi duenez, “kanpaina hauen bidez, tokiko merkataritza txikiari salmentetan bultzada txiki bat ematea espero dugu. Herritarrak animatzen ditugu bonuak erostera eta udalerrian kontsumitzera, tokiko ekonomiari laguntzeko modu bat baita, eta, aldi berean, erabiltzaile bakoitza deskontuaz baliatzen da. Horrelako ekintzak beharrezkoak dira kaleetan kalitatezko merkataritza eta ostalaritza duen udalerria izaten jarraitu nahi badugu. Gainera, 65 urtetik gorakoentzako salmenta puntu presentziala bezalako neurriekin, kanpaina honetan pertsona guztien parte hartzea erraztu nahi dugu”.
Alex Palacios Dendak Bai elkarteko presidenteak positibotzat jo du ekimena: “tokiko merkataritzarentzat, horrelako kanpainak aukera bat dira bezeroak erakartzeko eta Durangoko kaleak dinamizatzeko. Garrantzitsua da Udalak horrelako ekimenen aldeko apustua egiten jarraitzea, bultzada ekonomikoa eta merkataritza-sarea indartzea uztartzen baitituzte. Dendak Bai-tik proposamen hau erabat babesten dugu eta durangarrak bonoekin erostera eta gure denda, taberna eta hurbileko zerbitzuetan konfiantza izaten jarraitzera animatzen ditugu”.
