Urkiola Landa Garapenak eta Erlete Eztiolak prestakuntza jardunaldiak antolatu dituzte Durangon, Iurretan eta Elorrion
BERRIZ | Gaur goizean aurkeztu da Berrizen Urkiola Landa Garapenak eta Atxondoko Erlete Eztiola Elkarteak sustatutako kanpaina, Vespa velutina espezie inbaditzaileari aurre egiteko. Espezie honek biodibertsitatea mehatxatzen du eta eragin zuzena dauka erlezainen sektorean. Ekimenak, eskualdeko udalen eta Bizkaiko Foru Aldundiaren laguntzarekin antolatuta, herritarrei zuzendutako informazio eta prestakuntza jardunaldiak barne hartzen ditu.
Eskualdeko erlezainen arabera, espezie honen presentziak ezti ekoizpena %70eraino murriztu du zenbait eremutan. Kanpainaren sustatzaileek, besteak beste Erramun Osa, Urkiola Landa Garapeneko presidenteak, eta Egoi Escudero, Erleteko kideak, azpimarratu dute udaberri hasieran jardutea funtsezkoa dela; izan ere, erregina diapausatik atera eta behin-behineko habia eraikitzen hasten da. “Oso garrantzitsua da lehen hilabete hauetan erreginak harrapatzea bultzatzea”, nabarmendu dute.
Jardunaldiak
Saioek espeziea identifikatzeko eta bertako espezieetatik bereizteko tresnak eskainiko dituzte, baita tranpak jartzeko tekniketan prestakuntza eta eskualde osoan jarritako tranpa geolokalizatuen boluntariotza sarearen koordinazioa ere. Aurreko kanpainetan, 100 boluntario ingururen laguntzari esker, tartean Idoia Madariaga irakaslea, 18.000 liztor inguru harrapatu ziren. Jardunaldiak martxoaren 10ean egingo dira Iurretan (Ibarretxe Kultur Etxea), 11n Durangon (Udaleko osoko bilkura aretoa) eta 12an Elorrion (Iturri Kultur Etxea), guztiak 18:00etan, eta sarrera librea izango da lekua bete arte.
