Jeltzaleek mozio bat aurkeztuko du hurrengo udal osoko bilkuran
ABADIÑO | Abadiñoko EAJ-PNV udal taldeak mozio bat aurkeztuko du hurrengo udal osoko bilkuran, Udalak 16 eta 30 urte bitarteko gazteak kontratatzeko laguntza-programara urtero eta modu egonkorrean atxikitzea bermatzeko.
Mikel Garaizabal bozeramaile jeltzaleak gogorarazi duenez, “programa hauek tresna eraginkorra dira Abadiñoko gazteei prestakuntza eta lan-esperientzia eskaintzeko”, aurreko legealdian EGF Plus 2021-2027 programarekin gertatu zen bezala.
Garaizabalek azpimarratu du bere taldeak programara atxikitzeko eskaera egin arren, aurten ere ez dela gazteen kontrataziorik gauzatu. “ Udala laguntza-programara atxikitzen ez delako, legealdi honetan aukera bat galtzen ari gara gure gazteentzat, eta ezin dugu berriro gertatzea onartu”, adierazi du.
Aurreko legealdian, hainbat gaztek Udalean lan egiteko aukera izan zuten tokiko erakundeentzako EGF Plus 2021-2027 laguntza-programaren bidez, gazteen kontrataziora bideratua. Programa horrek 8 eta 12 hilabete arteko lan-kontratuak eskaintzen ditu, lanaldi osoan, kolektibo honentzat aukera ona izanik.
Mozioak proposatzen du Gobernu Taldeak etorkizuneko deialdien izapidetzea epe barruan bermatzea, egungo egoera berriro gerta ez dadin, eta –lege-esparruaren barruan– Abadiñoko gazteria lehenestea udaleko lan-eskaintzetan.
