Isunak, Matute plazan eta Santa Marian zaintza gehiago eta kontzientziazio kanpainak ere eskatu dituzte
DURANGO | Udalak amaitu du bide publikoan edari alkoholdunen kontsumoa arautuko duen ordenantza prestatzeko aurrekontsulta publikoa.
Kontsulta 2025eko ekainaren 4tik 17ra egin zen, Partehartu plataformaren bidez, herritarren iritzia ezagutzeko eta espazio publikoetako bizikidetza eta segurtasuna hobetzen lagunduko duten proposamenak jasotzeko.
Guztira 117 pertsonak parte hartu zuten galdera itxiak eta irekiak zituen galdetegi baten bidez. Profil soziodemografikoari dagokionez, % 56,41 emakumeak izan ziren (66 pertsona), % 42,73 gizonak (50 pertsona) eta % 1,70 beste identitate batzuk edo zehaztu gabeak (1 pertsona). Adinaren araberako banaketa zabala izan zen: % 11,96k 30 urte baino gutxiago zituen, % 18,80k 30 eta 39 urte artean, % 25,64k 40 eta 49 artean, % 26,49k 50 eta 59 artean, % 11,11k 60 eta 69 artean, eta % 5,98k 70 urte edo gehiago. Ordezkaritza handiena izan zuen taldea 40 eta 60 urte bitartekoa izan zen, guztizkoaren % 52,13rekin.
Emaitzei dagokienez, parte-hartzaileen % 27,35ek adierazi zuen alkoholaren kontsumoarekin lotutako egoera gogaikarri edo arriskutsuak bizi izan zituela bide publikoan, eta % 71,79k, berriz, ezezko erantzuna eman zuen. Arazo aipagarrienen artean zarata eta zikinkeria (galdera honen erantzunen % 60 baino gehiagotan agertzen dira), borrokak eta segurtasunik ezaren sentsazioa (% 22) nabarmentzen dira, baita bandalismo ekintzak edo kalte materialak ere, batez ere ibilgailuetan eta atarietan (% 7).
Santa María eta Matute
Identifikatu diren eremu arazotsuenak Santa Maria eta Alde Zaharra dira (erantzunen % 50), eta San Frantziskoren atzealdeko “Matute” plazatxoa (% 25 inguru). Barandiaran eta Plateruena bezalako lekuak ere jaso ziren, aipamen kopuru txikiagoarekin. Espazio horietan behatutako arazoak aurretik aipatutakoekin bat datoz: zikinkeria, zaratak, borrokak eta gizalegearen aurkako jokabideak.
Kontsultak praktika hori udal ordenantza baten bidez arautzeko beharrari buruzko iritzia ere jaso zuen. Inkestatutako pertsonen % 86,32k uste du beharrezkoa dela Udalaren esku-hartzea; % 10,25ek, berriz, ez du egokitzat jotzen, eta % 3,41ek ez du erantzun. Alde agertzen direnek behin eta berriz esan dute arau argiak eta zigorrak ezarri behar direla betetzen ez dutenentzat. Bestalde, neurri hori arbuiatzen dutenek kontzientziazioan oinarritutako alternatibak proposatzen dituzte, bereziki gazteei zuzenduta.
Ordenantzak jaso beharko lituzkeen helburuen artean, lehentasunezko lau eremu nabarmentzen dira: poliziaren presentzia handiagoa eta zigorren aplikazio eraginkorra; gazteei zuzendutako hezkuntza kanpainak; herritarren bizikidetza sustatzea; eta atsedena eta hiri-garbiketa hobetzea. Gainera, beste proposamen osagarri batzuk egin dira, hala nola lehen arau-haustetik zigorrak ezartzea (lau erantzunetatik bat), indarrean dagoen araudia zorroztasun handiagoz aplikatzea, udalerriaren kanpoaldean gazteentzako aisialdi-guneak prestatzea (% 9), sentsibilizazio-kanpainak abian jartzea (% 6,49) eta eragindako eremuetan hiri-zerbitzuak indartzea komun eramangarriak eta edukiontziak jarriz (% 3,89).
Kontsultari esker, argi eta garbi identifikatu ahal izan dira bide publikoan erregulatu gabeko alkohol-kontsumoari lotutako arazo nagusiak, besteak beste, zarata, zikinkeria, borrokak eta gizalegerik eza. Halaber, adostasun zabala erakutsi da berariazko udal-erregulazio baten beharrari buruz, hezkuntza-, prebentzio- eta hirigintza-neurriek lagunduta. Jasotako ekarpenak oinarri izango dira udalerriaren errealitatera egokitutako eta herritarrek adierazitako eskaerekin bat datorren ordenantza bat egiteko.
Gobernu taldeak dagoeneko prestatu du ordenantzaren zirriborro bat, kontsulta publikoan durangarrek egindako ekarpenak jasota. Testu hau oposizioko taldeei aurkeztu zaie haien proposamenekin dokumentua aberastu dezaten, eta Udalaren helburua iraileko Osoko Bilkuran bide publikoan alkoholaren kontsumoa arautzeko ordenantza berria onartzea da.
