Larunbatean, hilak 22, izango da San Frantzisko Elizan 19:00etatik aurrera
DURANGO | Musika Eskola eta Kontserbatorio Profesionalak Bartolome Ertzilla Orkestra Sinfonikoa aurkeztuko du datorren martxoaren 22an. Proiektu honek zentroko musika eskaintza zabaltzen du, sinfonia familietako instrumentu guztiak barne hartzen dituen orkestra berria sortuz. Talde honetan, 11 urtetik gorako 30 bat ikaslek parte hartuko dute, baita musika ibilbidea jarraitzen duten ikasle ohiek ere.
Orain arte, zentroak harizko instrumentuz osatutako ganbera-orkestra bat baino ez zuen. Orkestra sinfoniko berri honekin, Durangoko Musika Eskola eta Kontserbatorioak tamaina handiko talde batean parte hartzeko aukera eskaintzen die ikasleei, euren musika prestakuntzan aniztasuna islatzen duena.
Kontzertua 19:00etan izango da San Frantzisko Elizan, eta sarrera doakoa izango da bertaratzen direntzat. Bertan, Schuberten Sinfonia Osatugabea eta Mozarten Jostailuen Sinfonia bezalako errepertorio klasiko garrantzitsuak entzungai izango dira, orkestra berri honen ibilbide berriaren hasiera emanez.
Proiektu honek ekimen egonkor bihurtzea du helburu, herriko musikariek zein Durangoko beste musika erakundeek parte hartzeko aukera izango dutelarik, eta horrela, tokiko musikaren topagune eta garapen espazio bihurtuz. Irati Ortubia Orkestraren zuzendariaren arabera, ikasle ohien parte-hartzea proiektuaren funtsezko alderdietako bat da, izan ere, helburua zentroan formakuntza jaso duten musikarien belaunaldi desberdinen arteko harremana mantentzea da.
