Txotxongilo konpainiak Familia Ikuskizun Onenaren garaikurra eskuratu du Meridako galan
DURANGALDEA – Meridako Antzoki Erromatarrak bere jantzirik onenak jantzi ditu astelehen honetan, 2026ko ekainaren 1ean, Arte Eszenikoen Max Sarien XXIX. edizioa hartzeko. Gure eskualdeko talentua estatuko eszenaren gailurrean kokatu duen emozioz beteriko gaua izan da, ‘Andereño’ antzezlana nagusitu baita oholtza gainean.
Anita Maravillas eta Portal 71 konpainia zornotzarraren ekoizpenak pronostiko guztiak bete ditu eta sagar preziatua eraman du Haur, Gazte edo Familia Publikoarentzako Ikuskizun Onenaren kategorian.
Gaueko momenturik goren eta hunkigarriena Miren Larreak protagonizatu du, hitzaldia irakurri duenean, euskal memoria historikoa egungo nazioarteko gatazkekin lotuz. “‘La Maestra’ (‘Andereño’) lanak kulturak gerraren aurrean duen indarraz hitz egiten digu, poesiak barbariearen aurrean duen indarraz”, hasi du Larreak mikrofono aurrean. “Inspiratu gintuzten maisu-maistrak, andereñoak, beharrezkoak izan ziren; eta gaur egun ere bizi-bitalak dira, eta euren borrokak baita ere”.
Anita Maravillaseko sortzaileak elkartasun mezu global eta sakona zabaldu nahi izan du jarraian: “Gure andereñoak gaur beste andereño batzuekin konektatzen du. Nur Nasarrekin, adibidez; hondakinen eta errefuxiatu-denden artean lanean ari den palestinar andereñoarekin. Eta hark dioen bezala, eta honekin amaitzen dut: nahiz eta gure eskolak suntsituak izan, lapitzaren eta paperaren hots soilak herrialde horretara egunen batean itzuliko garen itxaropena mantentzen du. Eskerrik asko bihotzez!”, amaitu du antzoki osoaren txalo zaparrada jaso bitartean.
Ganso & Cía saririk gabe
Durangaldeko ordezkaritzaren beste aldea Ganso & Cía Durangoko taldearena izan da. Haien kale-antzerki keinu-bikoitz arrakastatsua, ‘Welcome & Sorry’, Kale Ikuskizun Onenaren sarirako izendatuta zegoen. Tamalez, kategoria honetako Max saria Txema Muñozen Gota lanarentzat izan da azkenean.
