Saihesbidearen plataformak ontzat jo du aprobazio hori, eta aurreratu du Urtiako tartea 2025. urtearen amaieran abiatuko dela
ERMUA | Ostiralean, abenduak 27, foru aurrekontuak onartu ziren eta “Ermuko Saihesbidea – Ya saihesbidea” herri plataforma zalantza bat kendu zuen. Izan ere, azkenean, Goitondoko fasearen eraikuntza proiektuaren idazketa finantzatzeko 1.6 milioiko partida bat jasotzen da.
Era berean, eta plataformak baieztatu duenez, aurreikusita dago Urtiako zatiko obrak 2025. urtearen amaieran hastea, baina eraikuntza-proiektua oraindik onartu ez denez, diruzaintzako gerakinaren bidez finantzatuko da.
Plataformak pausu horiek «modu positiboan» baloratu baditu ere, gogorarazi dute «PSOEk eta EAJk 2023an hitzartutako kronograma betetzearen barruan kokatzen direla, baina ez dela proiektua bizkortu». Kronograma hori, herri-mobilizazioen ziklo baten ondoren aurrerapausoa izan bazen ere, «gutxiegitzat» jo zuen plataformak, Goitondoko zatiko obren hasiera 2027an kokatzen baitu, eta saihesbidearen amaiera, gutxienez, 2030ean.
Horregatik, plataformak hiru ardatzen inguruko akordio handi baten beharra azpimarratzen jarraitzen du. Saihesbidea amaitzeko behar diren partida ekonomikoak, herritarrekiko informazioa eta gardentasuna eta udalerriko trafiko astunaren aldi baterako murrizketak ziurtatzea.
Helburu horiek Ermuko Gobernu Taldeari helarazi zitzaizkion, urriaren amaieran udal gobernuak berak deitutako bileran, eta mozio berri bat prestatzeko eskatu zitzaion plataformari. Proposamen zehatza azaroaren lehen astean igorri zitzaien alkateari eta PSOEko eta EAJko ordezkariei. Plataformaren ustez, akordioa «espero baino gehiago luzatzen ari da», baina ahalik eta azkarren adostasunera iristea espero du.
