Diruz lagundutako 166 bonu merkaturatzen dituen Euskadiko bigarren udalerria izango da
ABADIÑO | Durango eta Zaldibarren programa hau bultzatzeko iragarpenaren ondoren, Abadiñoko Udalak, Psikologiako Elkargo Ofizialarekin lankidetzan, udalerrian laguntza psikologikoa jasotzeko aukera hobetzeko ekimen berri bat jarri du martxan. Psikobonuen programarekin, terapiara joatearekin lotutako estigma hautsi nahi da, eta osasun mentala zaintzearen garrantzia ikusarazi, hori funtsezkoa baita ongizate integralerako. Hortik dator kanpaina honen goiburua: “Zure osasun mentala zaintzen baduzu, zure bizitza zaintzen duzu”. Ekimen honekin, Abadiño Euskal Autonomia Erkidegoko hirugarren udalerria da horrelako programa aitzindari bat ezartzen.
Programak diruz lagundutako 166 bonu eskainiko ditu psikologiako profesionalekin saioak egiteko. Ekimen honi esker, abadiñarrek aukera izango dute saioetara kostu txikiarekin sartzeko, bakoitzak 5 euro bakarrik ordainduta, Udalak 60 euroko dirulaguntza ematen baitu bonu bakoitzeko. Pertsona bakoitzak 4 bonu erosi ahal izango ditu gehienez, eta 4 hilabeteko epean erabili beharko dira. Udalak 10.000 euro inguru bideratuko ditu kanpaina honetarako.
Programak bi helburu ditu: terapiarako sarbidea erraztea, bereziki pertsona ahulenei, eta herritarrak sentsibilizatzea prebentzioaren eta osasun mentalaren zaintzaren garrantziaz. Programa adin guztietako pertsonei zuzenduta dago, antsietatea, estresa eta depresioa bezalako arazoek gazteei eta adinekoei eragiten baitiete. Horri gehitzen zaio, COVID-19aren pandemiaren ondoren, gazteen artean antsietate eta estres kasuek gora egin zutela. Zehazki, gazteen % 8k antsietatea izan du, eta % 4k depresioa. Gainera, suizidioa da gazteen artean bigarren heriotza-kausa. 60 urtetik gorakoei dagokienez, komunitatearen % 15ek buruko gaitzen bat du.
Edurne Maguregi Gizarte Ongizateko zinegotziak nabarmendu duenez, “osasun mentalaren inguruko estereotipoak haustearen aldeko apustua egiten dugu. Arazoa agerian jarri nahi dugu, arduraz hitz egin, eta pertsona bakoitzak, bere adina edo egoera kontuan hartu gabe, laguntza profesionala eskura dezan sustatu. Erronka emozionalak eguneroko errealitatea diren garai honetan, terapiarako sarbidea normalizatu nahi dugu, eta edozein pertsonak bere osasun mentala zaintzeko beharrezko baliabideak izango dituela ziurtatu. Oztopoak eta aurreiritziak eraisten ditugu, norbera zaintzea inguratzen gaituztenak zaintzea ere badelako “.
Inskripzioa
Izen-ematea Bizkaiko Aldizkari Ofizialean eta Udalaren webgunean argitaratzen denean irekiko da, 15 egun naturaleko epean, eta gogorarazpenak bidaliko zaizkie herritarrei. Psikobonuak udal-bulegoetan eta Herritarrentzako Arreta Zerbitzuan eskatu ahal izango dira.
